देशमे बैंकिंग क्षेत्रक मुनाफा पहिल बेर ३ लाख करोड़ टाकाक आंकड़ा पार कऽ गेल अछि। प्रधानमंत्री नरेन्द्र मोदी एहि पर प्रसन्नता व्यक्त करैत कहलनि अछि जे पछिला १० सालमे बैंकक स्थितिमे बहुत सुधार भेल अछि आ एहिसँ गरीब, किसान आ एमएसएमईकेँ ऋण भेटबामे सहायता भेटल अछि।
सोशल मीडिया प्लेटफॉर्म एक्स पर पोस्ट करैत प्रधानमंत्री मोदी लिखलनि, “पछिला १० सालमे बैंकक व्यवस्थामे उल्लेखनीय बदलाव आयल अछि। एहि कारणेँ भारतीय बैंकक मुनाफा पहिल बेर बढ़ि कऽ ३ लाख करोड़क पार कऽ गेल अछि।”
मोदी आगू कहलनि, “जखन हम सत्तामे आयल छलहुं तखन यूपीए सरकारक फोन बैंकिंग नीतिक कारण बैंकसभकेँ भारी घाटा आ उच्च एनपीएक सामना करय पड़ि रहल छल। एहि कारणेँ आम लोकक लेल बैंकक दरवाजा बंद भऽ गेल छल। बैंकक स्वास्थ्यमे सुधारक प्रत्यक्ष लाभ गरीब, किसान आ मध्यम आ लघु उद्योगकेँ होयत।”
बतबैत चली वित्तीय वर्ष २०२३-२४ मे सरकारी आ निजी बैंक सब मिलि कऽ ३.१ लाख करोड़ केर लाभ दर्ज कयलक अछि। एहि अवधिमे सार्वजनिक बैंकक मुनाफा साल-दर-साल ३४ प्रतिशत बढ़ि कऽ १.४ लाख करोड़ आ निजी बैंकक मुनाफा ४२ प्रतिशत बढ़ि कऽ १.७ लाख करोड़ भऽ गेल अछि।
पछिला १० सालमे सार्वजनिक क्षेत्रक बैंकसभमे जबरदस्त परिवर्तन भेल अछि। बैंकक बैलेंस शीट मजबूत भेल। संगहि, गैर-निष्पादित परिसंपत्ति (एनपीए) मे पैघ गिरावट आयल अछि।
