पूर्वोत्तरक सबसँ पैघ शहर गुवाहाटी पूरा तरहसँ बदलल जा रहल अछि। एहि क्रममे शहरमे फ्लाईओवर निर्माणक काज सेहो तेजीसँ चलि रहल अछि। नगरक भीतर मौजूदा यातायातक समस्या केर समाधानक दिशामे एकटा छलांग लगाबैत मुख्यमंत्री डॉ. हिमंत विश्व शर्मा काल्हि बीरुबारी-लालगणेश फ्लाईओवरक शिलान्यास केलथि जे 376 करोड़क लागतसँ बनय जा रहल अछि। 2.84 किलोमीटर लंबा आ तीन लेन वाला एहि फ्लाईओवरक जंक्शन साइकिल फैक्ट्री, वर्षपाड़ा क्रिकेट स्टेडियम आ लालगणेश मार्केटक समीप होएत। लालगणेशमे आयोजित शिलान्यास कार्यक्रममे मुख्यमंत्री डिजिटल माध्यमसँ महानगरक लेल 24 टा सार्वजनिक शौचालय, 17 टा दाहसंस्कार मैदान, 2 टा कब्रिस्तान आ 31टा सभागारक उद्घाटन सेहो केलथि। एहि अवसर पर जनता कए संबोधित करैत ओ कहला जे पूर्वोत्तरक सबसँ पैघ शहर गुवाहाटीमे सार्वजनिक सुविधाक अभावसँ जुड़ल मुद्दा कए दूर करबा लेल गुवाहाटी नगर निगम आ राज्य सरकार लगातार प्रयासरत अछि। ओ आगू कहला जे राज्य परिवहन निगमक तहत गुवाहाटीमे 130 टा इलेक्ट्रिक बस आर आनल जाएत आ 2025-26 तक गुवाहाटीमे डीजल आ पेट्रोल बस नहिं रहत। एकर बाद अगिला दू सालमे गुवाहाटीमे पेयजलक समस्याक समाधान भऽ जाएत। ओ कहला जे प्रधानमंत्री नरेंद्र मोदी 4 फरवरी कए अपन निर्धारित यात्राक दौरान गुवाहाटीमे किछु परियोजनाक शुरुआत करताह। कार्यक्रमक अवसर पर कार्बी आंगलोंग स्वायत परिषदक मुख्य कार्यकारी तुलसीराम रोंगहांग, विधायक सिद्धार्थ भट्टाचार्य, रमेन्द्र कालिता, अतुल बोरा, जीएमसी केर मेयर मृगेन शराणिया, गुवाहाटीक पुलिस आयुक्त दिगंत बोरा सहित अन्य कतेको अधिकारी आ गणमान्य व्यक्ति सब उपस्थित छलाह।
