आम आदमी पार्टी (आप)क राष्ट्रीय संयोजक केजरीवाल द्वारा आम आदमी पार्टीक उम्मीदवारक खरेदीक दावाक बाद भ्रष्टाचार निरोधक ब्यूरो (एसीबी) आब एहि मामिलाक जाँच शुरू कऽ देलक अछि। शुक्रदिन एसीबीक टीम अरविन्द केजरीवालक निवास पर पहुँचलाक बाद आप’क कानूनी प्रमुख संजीव नसियार एहि कार्यवाही पर सवाल उठौलनि। मीडियासँ बातचीत करैत आप’क कानूनी प्रमुख संजीव नसियार कहलनि, “भाजपा राजनीतिक नाटक बनेबाक प्रयास कऽ रहल अछि। किएक तऽ जे लोकनि एतय आयल छथि हुनका लग कोनो लिखित आदेश नहि अछि जे ओ एतय पूछताछ करबाक लेल आयल छथि। एसीबीक लोक बाहर अछि, कियो भीतर नहि गेल अछि। जखनि हम हुनका सभसँ नोटिस मँगलहुं तखनि ओ सभ नहि देखौलनि।
ओ आगू कहलनि, “एसीबी टीम कोनो नोटिस नहि देखेलक। ई एखन धरि स्पष्ट नहि अछि जे ओ नोटिस तैयार करबाक निर्देश केकरासँ लऽ रहल छथि, चाहे भाजपा वा कोनो आनसँ। एहि टीममे छःटा सदस्य छथि आ ओकर प्रभारी सेहो लगातार फोन पर केकरोसँ गप्प कऽ रहल छथि। हम एतबे कहब जे हम कोनो अवैध गतिविधिकेँ अनुमति नहि देब। जँ कानूनी नोटिस देल जाइत अछि तँ हम ओकर जवाब देब। संजीव नसियार कहलनि जे एसीबीक टीम एखनि घरसँ बाहर अछि आ जाधरि नोटिस नहि देखाओल जायत ताधरि कोनो कार्यवाही नहि कयल जायत। हमर तरफसँ शिकायत पहिले दर्ज कएल जा चुकल अछि।
जनतब अछि जे एसीबीक टीम शुक्रदिन आम आदमी पार्टीक राष्ट्रीय संयोजक अरविंद केजरीवालक आवास पर पहुंचल। ई टीम केजरीवालक घर पर उपस्थित छल आ हुनका १५ करोड़क दावाक संबंधमे पूछताछ करत। वास्तवमे, दिल्लीक पूर्व मुख्यमंत्री अरविन्द केजरीवाल बृहस्पतिकेँ आरोप लगओलनि जे हुनक १६ उम्मीदवारकेँ दोसर पार्टीमे शामिल होयबाक लेल फोन आयल आ हुनका १५-१५ करोड़क प्रस्ताव देल गेल।
