मिथिला पेंटिंगक शिल्पगुरु पद्मश्री गोदावरी दत्तक निधन, कला जगतमे शोक

पटना समदिया
*

मिथिला चित्रकलाक शिल्पगुरु मानल जायवला गोदावरी दत्तक दीर्घ बीमारीक बाद निधन भऽ गेलनि। पद्मश्रीसँ सम्मानित गोदावरी दत्त ९३ वर्षक छलथि। मिथिला पेंटिगकेँ घरसँ निकालि दुनियाक सामने अनबामे गोदावरी दत्तक पैघ भूमिका छल। बहुत बूढ़ भेलाक बादो ओ अपन चित्रकला कौशलसँ एहन चित्र बनबैत रहलीह जे देखनिहार मंत्रमुग्ध भऽ जाइत छथि। गोदावरी दत्तक जन्म १९३० मे दरभंगाक लहेरियासरायमे एकटा निम्न मध्यम वर्गीय कायस्थ परिवारमे भेल छल। हुनकर विवाह मधुबनीक राँटी गाममे उपेन्द्र दत्तसँ भेल छल। जतए सs हुनकर चित्रकला यात्रा शुरू भेल। मिथिला चित्रकलाक प्रसिद्ध कलाकार पद्मश्री गोदावरी दत्तक निधन भऽ गेल अछि। ९३ वर्षीय गोदावरी दत्त पछिला एक सप्ताहसँ कोमामे छलथि। किडनी खराब भए गेल छल। डॉक्टर जवाब दs देलखिन।

पद्मश्रीसँ सम्मानित गोदावरी दत्तकेँ दर्जनों राष्ट्रीय आ अन्तर्राष्ट्रीय पुरस्कार भेटल अछि। गोदावरी दत्त पछिला पाँच दशकसँ मिथिला क्षेत्रीय बिहारक मधुबनीमे मिथिला चित्रकला पर काज कऽ रहल छलथि। हुनकासँ मधुबनी पेंटिंग सीखबाक लेल पैघ संख्यामे लोक अबैत छल। एखन धरि ओ कतेको बेर अलग-अलग देशक दौरा कऽ चुकल छलथि। ओ एहि शिल्पक स्थापना विदेशमे कयने छथि। हुनक चित्र जापानक मिथिला सङ्ग्रहालयमे सेहो प्रदर्शित अछि।