लोकसभा चुनावके देखैत हर राजनीतिक दल, अप्पन – अप्पन घोषणापत्र जारी कएलक अछि, कांग्रेस पार्टी सभसँ पहिने न्याय पत्रके नामसँ अप्पन घोषणा पत्र जारी कएलक। भाजपा सेहो अप्पन चुनावी घोषणा पात्र जारी कएलक आ भाजपा द्वारा एहि घोषणापत्रके संकल्प पत्र कहल गेल। एहि क्रममे एकटा आओर राजनीतिक दल, राजद सेहो अप्पन चुनावी घोषणापत्र जारी कएलक, आ राजद द्वारा एहि घोषणापत्रके परिवर्तनपत्र नाम देल गेल अछि। आ एहि परिवर्तनपत्रके जारी भेलाक उपरांत, प्रदेशमे पुनः एक बेर नौकरी संबंधी राजनीतिके हवा देल जा रहल छैक। तेजस्वी यादव, एहि चुनावमे अप्पन घोषणापत्रके सहारे केंद्र सरकारके, प्रदेशमे नौकरी सन मुद्दा पर घेरबाक प्रयास क’ रहल छथि। लोकसभा चुनावके ल’ क’ राजद द्वारा जारी अप्पन परिवर्तनपत्रमे, एक करोड़ नौकरीक वचन देल गेल छैक, संगहि बहीन सभकेँ एक लाख रुपैया देबाक बात सेहो कहल गेल अछि। राजद द्वारा जारी परिवर्तनपत्रमे 10 फसलके लेल एमएसपी अर्थात न्यूनतम समर्थन मूल्य देबाक भरोस सेहो देल गेल छैक। सीएम नीतीशक सात निश्चयक भांति, तेजस्वी यादव सेहो राजदक घोषणापत्रमे 24 वचन देने छथि। जाहिमे, बिहारके विशेष राज्यक दर्जा दिएबाक वचन सेहो अछि। ओना त’ चुनावसँ पूर्व चुनावी घोषणापत्र जारी करबाक पुरान परंपरा छैक, मुदा राजनीतिक दल कखनहुँ काल एहि घोषणापत्रके किछु विशेष नामसँ संबोधित करैत अछि फलतः चुनावी घोषणापत्र कएक बेर न्याय पत्र, त’ परिवर्तनपत्र त’ कखनहुँकाल संकल्पपत्रके रूपमे जारी कएल जाइत अछि। देशमे समस्याक कोनो ओर अंत नहि छैक, मुदा जे मूल समस्या, देशक समक्ष मुंह बौने ठाढ़ अछि, ओ अछि, बेरोजगारी, मंहगाई, भ्रष्टाचार आ उचित स्वास्थ्य सेवाक आभाव। हर राजनीतिक दलक घोषणापत्रमे, एहि सभसँ संबंधित उपाय रहिते छैक, मुदा तैयो देशसँ एहि तरहक समस्याक कोनो निराकरण, आई धरि नहि भेल अछि। नौकरीके मामिलामे तेजस्वी यादव गंभीर छथि, ई त’ हुनक छोट छीन कार्यकालसँ सिद्ध होइत अछि, मुदा एहि ठाम बेरोजगारी, मात्र बिहारे नहि अपितु सम्पूर्ण देशक समस्या अछि, त’ राजदक घोषणापत्रमे वर्णित ई विषय, सम्पूर्ण देश लेल कतेक प्रभावकारी सिद्ध होयत ताहि पर संशय अछि। ओना भाजपा द्वारा, राजदक एहि परिवर्तन पत्र पर, कटाक्ष करब शुरू भ’ चुकल अछि। पूर्व मंत्री आ भाजपा नेता जीवेश मिश्र कहलनि कि अप्पन परिवारसँ बाहर एक्कहु व्यक्तिके नौकरी नहि देनिहार आई, एक करोड़ लोककेँ नौकरी देबाक गप्प कहि रहल अछि। भाजपा नेताक अनुसार, एहिसँ पैघ हास्यास्पद स्थिति की भ’ सकैत अछि कि, 23 सीट पर चुनाव लड़एवला दल, देशके लेल घोषणा-पत्र जारी क’ रहल अछि। तहिना राजदक परिवर्तन पत्र पर, उप मुख्यमंत्री विजय सिन्हाक कहब अछि कि, राजदक परिवर्तन पत्र भ्रमित करएवला अछि। सोझ भाषामे कहल जाए त’ राजद द्वारा जारी परिवर्तनपत्रके हास्यास्पद कहि एकरा भ्रामक सिद्ध करबाक प्रयास, भाजपा द्वारा कएल जा रहल अछि। एहनो नहि छैक कि, भाजपा मात्र राजदक घोषणापत्र पर कटाक्ष क’ रहल अछि, पीएम मोदी द्वारा त’ कांग्रेस पार्टीक घोषणापत्र पर सेहो प्रश्नचिन्ह लगाओल गेल अछि। पीएम मोदी त’ अप्पन वक्तव्यमे कांग्रेसक घोषणापत्र पर मुस्लिम लीग आ वामपंथीक छापक गप्प सेहो कहलनि। ओना, वामपंथी दल सीपीआई, सीपीआई (एम) आ सीपीआई (एमएल) सेहो इंडिया गठबंधनक हिस्सा अछि आ वाम दल द्वारा सेहो चुनावी घोषणापत्र जारी कएल गेल अछि। हर राजनीतिक दल अप्पन अप्पन घोषणापत्रमे ओ तमाम घोषणा कएने अछि जे पारम्परिक रूपसँ चुनावक समय अपेक्षित मानल जाइत छैक। एहि बेरक घोषणापत्रमे हर दल नौकरी, स्वास्थ्य सेवा आ मुफ्त योजना पर किछु बेसी ध्यान देने अछि, कांग्रेस अप्पन न्यायपत्रमे, राष्ट्रीय न्यूनतम वेतन 400 रुपैया प्रतिदिन करबाक बात कहने अछि संगहि, सरकार गठनके उपरांत लोकक स्वास्थ्यक देखभालके लेल 25 लाख धरिक कैशलेस बीमाक राजस्थान मॉडल, सम्पूर्ण देशमे लागू करबाक गारंटी देने अछि। कांग्रेस अप्पन घोषणापत्रमे किसानसँ वादा कएलक अछि कि, स्वामीनाथन आयोगक परामर्शके अनुसार एमएसपी लागु करत। एहि तमाम घोषणापत्रके अतिरिक्त भाजपा सेहो अप्पन घोषणापत्र, संकल्पपत्रके नामसँ जारी कएलक अछि। 76 पन्नाक भाजपाक संकल्प पत्रमे, विकसित, आत्मनिर्भर भारतक विजन बतएबाक संग – संग यूसीसी (समान नागरिक संहिता), पाइपलाइनके माध्यमे लोक धरि गैस पहुंचएबाक बात संगहि करोड़ो घर धरि विनाशुल्क बिजली पहुँचएबाक वचन देल गेल अछि। भाजपा, हर दलक घोषणापत्र पर कटाक्ष कएलक त’ बारी आब विपक्षक छैक त’ विपक्षक अनेको नेता द्वारा एहि घोषणापत्रके, जुमलापत्र कहल जा रहल अछि। मुदा भाजपा अप्पन संकल्पपत्रके, अगिला सरकारक विजन दस्तावेज कहि रहल अछि। मिला जुला क’ कहल जाए त’ देशक राजनीतिक दल, बेरोजगारी आ महंगाई सनक समस्याके अप्पन चुनावी मुद्दा बनबैत अछि। आ ई मुद्दा 1952 सँ एखन धरि हर चुनावी घोषणापत्रमे शामिल कएल जाइत रहल अछि। मुदा एखनहु ई तमाम विषय, जसक तस बनल अछि।
