अमेरिकी राष्ट्रपति डोनाल्ड ट्रंप आ उद्योगपति एलन मस्कक बीच बिगड़ैत संबंध आब एकटा नव मोड़ लऽ रहल अछि। टेस्लाक सीईओ मस्क एकटा नव राजनीतिक पार्टीक गठनक घोषणा कयलनि अछि। मस्क एकर नाम ‘अमेरिका पार्टी’ रखलनि, जकर उद्देश्य देशक ‘एक दलीय प्रणाली’ केँ खतम करब अछि।
टेस्ला आ स्पेसएक्स केर सीईओ ई घोषणा शनिदिन ‘एक्स’ केर माध्यमसँ कयलनि। मस्क अपन संदेशमे दूनू प्रमुख पार्टी पर आरोप लगेलनि कि ओ अनियंत्रित सरकारी खर्च आ भ्रष्टाचारमे योगदान दैत अछि। हुनक अनुसार देश आब लोकतंत्रक रूपमे नै बल्कि अपव्यय आ स्वार्थसँ संचालित एकजुट राजनीतिक मशीनक रूपमे काज करैत अछि।
मस्क लिखलनि, “अमेरिका द्विदलीय बर्बादी आर भ्रष्टाचारक कारण दिवालिया भऽ रहल अछि। ई लोकतंत्र नहिं अछि। ई भेष बदलि एक दलीय व्यवस्था अछि। अमेरिका पार्टीक निर्माण एहि लेल कयल गेल कि स्वतंत्रता वापस मिलि सकय।”
ई कदम अमेरिकी राष्ट्रपति डोनाल्ड ट्रंपक पूर्व सहयोगी मस्क लेल एगो नाटकीय राजनीतिक बदलावक रूपमे सामने आबि रहल अछी जे पहिने ट्रंप केर समर्थन करयवाला सबसँ प्रमुख दातामे सँ एक छलथि।
ट्रंप स्वतंत्रता दिवस मनाबय केर दौरान ‘वन बिग ब्यूटीफुल बिल’ पर हस्ताक्षर कयलनि, जे आब कानून बनि गेल छै । एलन मस्क पहिने चेतावनी दऽ चुकल छलाह जे जँ ई विधेयक पारित भऽ गेल तऽ अमेरिकामे एकटा नव पार्टी बनत।
नबका पार्टीक घोषणा मस्क आ ट्रंपक बीच हाई प्रोफाइल झगड़ाक बाद कयल गेल, जे कहियो राजनीतिक सहयोगी छल। मस्क केर सरकारी दक्षता विभाग (डीओजीई) केर प्रमुखक रूपमे संक्षिप्त कार्यकालक दौरान तनाव बढ़ि गेल, जतय ओ खर्चमे कटौती आ संघीय कार्यबल नीतिमे कमी केर धक्का देलकक जे ट्रंपक भारी घरेलू बजटसँ टकरायब छल । एकर बाद मस्क ट्रंप केर राजकोषीय एजेंडा केर मुखर आलोचक रहल छथि।
