प्रायः ९० लाख अधिक छात्र उच्च शिक्षामे नामांकित भेल

*
कुल ४.३२ करोड़ छात्र नामांकित भेल
*
नई दिल्ली
*
उच्च शिक्षा प्राप्त करैवला भारतीय छात्रक संख्यामे लगभग ९० लाखक वृद्धि भेल अछि। पहिने जतय उच्च शिक्षाक लेल नामांकित छात्रक संख्या लगभग ३.४२ करोड़ छल, आब उच्च शैक्षणिक संस्थानमे छात्रक कुल नामांकन बढ़ि कऽ ४.३२ करोड़ भऽ गेल अछि।
शिक्षा मंत्रालयक एकटा रिपोर्टक अनुसार, एकटा आओर महत्वपूर्ण उपलब्धि ई अछि जे लगभग दू करोड़ छात्रा उच्च शैक्षणिक संस्थानमे नामांकित भेलैथ।
केन्द्रीय शिक्षा मंत्री धर्मेन्द्र प्रधानक अनुसार, २०१४ मे उच्च शिक्षामे छात्रक कुल नामांकन ३.४२ करोड़ वा २३ प्रतिशत छल। २०२१-२२ केर सर्वेक्षणक अनुसार, उच्च शैक्षणिक संस्थानमे छात्रक कुल नामांकन बढ़ि कऽ ४.३२ करोड़ अर्थात २८ प्रतिशत भऽ गेल अछि। शिक्षा मंत्रीक अनुसार, ई संख्या चालू वर्षक लेल आओर बेसी भऽ सकैत अछि। जतय उच्च शिक्षाक क्षेत्रमे भारतीय छात्रक संख्या बढ़ल अछि, ओतहि शिक्षाक क्षेत्रमे लड़कीसभक संख्यामे उल्लेखनीय वृद्धि भेल अछि।
शिक्षा मंत्री कहलनि जे वर्ष २०१४ केर तुलनामे आइ ३१.६ प्रतिशत बेसी छात्रा पढ़ि रहल छथि। रिपोर्ट उच्च शिक्षामे निर्णायक वृद्धि देखबैत अछि मुदा एखन धरि अपन नामांकन लक्ष्यपर नहि पहुँचल अछि। नव राष्ट्रीय शिक्षा नीति (एनईपी)क लक्ष्य २०३५ धरि उच्च शिक्षामे छात्रसभक कुल नामांकन (जीईआर)क ५० प्रतिशत धरि पहुँचबाक अछि। एहि रिपोर्टक अनुसार, उच्च शिक्षामे सबसँ बेसी नामांकन उत्तर प्रदेश, महाराष्ट्र, तमिलनाडु, मध्य प्रदेश, कर्नाटक आ राजस्थान सन राज्यमे भेल अछि। अपन बेहतर प्रदर्शनक कारण ई राज्य उच्च शिक्षाक क्षेत्रमे शीर्ष छहमे शामिल भऽ गेल अछि। कॉलेज, तकनीकी महाविद्यालय, बीटेक, एमबीबीएस सहित उच्च शिक्षा प्राप्त करैवला छात्रसभमेसँ ७९ प्रतिशत छात्र स्नातक स्तरक छथि। संगहि लगभग १२ प्रतिशत स्नातकोत्तर स्तरक छथि। स्नातक स्तरपर नामांकित अधिकांश छात्र कला संकायसँ छथि। विज्ञान १५.५ प्रतिशत, वाणिज्य १३.९ प्रतिशत आ अभियांत्रिकी आ प्रौद्योगिकी ११.९ प्रतिशत पढ़य वाला छात्र अछि।
रिपोर्टमे कहल गेल अछि जे देशमे १,११३ विश्वविद्यालय आ ४३,७९६ महाविद्यालय अछि। मंत्रालयक अनुसार, महाविद्यालय आ विश्वविद्यालयक संख्यामे लगातार वृद्धि भऽ रहल अछि। रिपोर्टमे कहल गेल अछि जे वर्ष २०१९-२०क तुलनामे उच्च शैक्षणिक संस्थानक संसाधनमे वृद्धि भेल अछि। २०१९-२०मे ८६ प्रतिशत उच्च शैक्षणिक संस्थानमे कम्प्यूटर केन्द्र छल, जखन कि २०२०-२१ मे ९१ प्रतिशत संस्थानमे कम्प्यूटर केन्द्र छल। २०१९-२०मे मात्र ५८ प्रतिशत उच्च शैक्षणिक संस्थानमे कौशल केन्द्र छल। २०२०-२१ मे ६१ प्रतिशत संस्थानमे कौशल केन्द्र छल। उच्च शिक्षामे भारतीय छात्रसभक बढ़ैत रुचि एहि तथ्यसँ सेहो परिलक्षित होइत अछि जे एहि बेर १२.३ लाख अभ्यर्थी संयुक्त प्रवेश परीक्षा (जेईई) लेल आवेदन कयलनि अछि। ई एकटा रिकार्ड तोड़ैबला संख्या अछि. एहि बेर जेईई मेनक लेल पछिला बेरक तुलनामे ३.७ लाख बेसी छात्र आवेदन कयने छथि। रिपोर्टक अनुसार आवेदकमे बालिकाक संख्यामे सेहो उल्लेखनीय वृद्धि भेल अछि। आईआईटी, एनआईटी, एआईसीटीई के इंजीनियरिंग संस्थानमे प्रवेशक लेल जेईई परीक्षा आयोजित कयल जाइत अछि।

भारतक अतिरिक्त ई परीक्षा दोहा, दुबई, काठमांडू, मस्कट, रियाद , शारजाह, सिंगापुर, कुवैत, लागोस, कोलम्बो, जकार्ता, वियना, मास्को आ बैंकॉक सन विदेशी शहरमे आयोजित कयल जाइत अछि। संगहि आईआईटीक वैश्विक परिसर इंग्लैंड, मिस्र, सऊदी अरब, यूएई, कतार, मलेशिया आ थाईलैंड सन ७ देशमे खोलल जा सकैत अछि। आई.आई.टी. दिल्ली तऽ अपन अबू धाबी परिसरक लेल पूरा तैयारी कऽ लेने अछि। परिसर जनवरी २०२४ सँ शुरू होबय जा रहल अछि। ऊर्जा संक्रमण आ स्थिरतामे एम.टेक सन पाठ्यक्रमक घोषणा कयल गेल अछि।