दिल्ली शराब घोटाला मामिलामे मुख्यमंत्री अरविंद केजरीवालकेँ अंतरिम जमानत भेटलाक बाद की आब झारखंड मुक्ति मोर्चाक नेता आ पूर्व मुख्यमंत्री हेमंत सोरेनकेँ राहत भेटत ? सुप्रीम कोर्ट कथित भूमि घोटालासँ जुड़ल मनी लॉन्ड्रिंग मामिलामे हेमंत सोरेनक गिरफ्तारीक खिलाफ दायर याचिका पर आइ सोमकेँ सुनवाई करत।
सर्वोच्च न्यायालयमे न्यायमूर्ति संजीव खन्ना आ दीपांकर दत्ताक पीठ सोरेनक याचिकापर सुनवाई करत, जाहिमे झारखंड उच्च न्यायालयक ३ मईक आदेशकेँ चुनौती देल गेल अछि, जाहिमे गिरफ्तारीक विरुद्ध हुनकर याचिका खारिज कऽ देल गेल छल। सोरेन लोकसभा चुनावमे प्रचार करबाक लेल अंतरिम जमानत सेहो माँगने छलाह जाबत धरि अदालत गिरफ्तारीक विरुद्ध हुनकर याचिका पर फैसला नहिं दैत अछि।
उच्चतम न्यायालय १० मईकेँ सोरेनक ओहि याचिकाक निस्तारण कऽ देलक जाहिमे मनी लॉन्ड्रिंग मामिलामे हुनकर गिरफ्तारीक विरुद्ध हुनकर याचिका पर निर्णय लेबाक लेल उच्च न्यायालयकेँ निर्देश देबाक मांग कयल गेल छल।
पीठ कहलक जे याचिका बेकार भऽ गेल अछि किएक तँ उच्च न्यायालय पहिनेसँ ३ मईकेँ अपन फैसला दऽ चुकल अछि आ झामुमो नेता पहिनेसँ एकरा उच्चतम न्यायालयमे चुनौती दऽ चुकल छथि।
“ई बेकार भऽ गेल अछि,” अदालत सोरेन के तरफ सँ उपस्थित वरिष्ठ अधिवक्ता कपिल सिब्बल आ अरुणाभ चौधरीसँ कहलक, जखन कि अधिवक्ता प्रज्ञा बघेलक माध्यमसँ दायर अपीलमे कहल गेल जे उच्च न्यायालय गिरफ्तारीक खिलाफ हुनकर याचिका खारिज करयमे गलती कयलक। उच्च न्यायालय ३ मईकेँ धनशोधन मामिलामे सोरेनक याचिका खारिज कऽ देलक आ हुनका जमानत देबासँ मना कऽ देलक।
झारखण्डक मुख्यमंत्रीक पदसँ इस्तीफा देलाक बाद सोरेनकेँ प्रवर्तन निदेशालय (ईडी) ३१ जनवरीकेँ गिरफ्तार कयलक। वर्तमानमे ओ राँचीक बिरसा मुण्डा केन्द्रीय कारागारमे न्यायिक हिरासतमे बंद छथि। ईडी आरोप लगओलक अछि जे सोरेन द्वारा करोड़ो रुपयाक जमीन अधिग्रहण करबाक लेल जाली दस्तावेजक उपयोग कऽ ‘डमी’ (नकली) विक्रेता आ खरीदारकेँ देखाकऽ आधिकारिक अभिलेखमे हेरफेर कऽ “भारी मात्रामे आपराधिक आय” अर्जित कयल गेल छल।
