गठबंधनक शक्ति कतेक महत्वपूर्ण होइत छैक, से भेल लोकसभा चुनावमे सभकेँ ज्ञात भऽ गेल अछि, तेँ गठबन्धनक सभ सहयोगी दल एक-दोसरा पर अटूट विश्वास व्यक्त करएमे लागल अछि। उत्तर प्रदेशमे सपा-कांग्रेसक गठबंधनसँ भाजपा केर कतेक नोकसान भेल से एखनि ताजा अछि, ओ तऽ संयोग निक छल जे चुनावसँ पहिने बिहारमे पुनः जदयू-भाजपाक गठजोड़ भऽ गेल अन्यथा बिहारोमे जबरदस्त झटका लागैत। दोसर तरफ नीतीश कुमारकेँ मात्र किछु मास राजदक संग रहलाक खामियाजा कतेक भेल से हुनका ज्ञात भऽ गेल, तेजस्वी यादव पूर्ण रुपसँ हावी होइत गेलाह आ सभटा क्रेडिट ओ १७ मासक लेबय केर प्रयास कयलथि, अर्थात जँ किछु दिन आओर जदयू-राजदक गठबंधन रहैत तऽ नीतीश कुमारक बादशाहत समाप्त भऽ जाइत आ राजद हावी रहैत, से नीतीश कुमारकेँ भली-भांति बुझयमे आबि गेलनि आ ओ पुनः पलटी मारलथि। तऽ आब जदयू-भाजपा दुनू एक-दोसरक लेल कतेक महत्वपूर्ण अछि से दुनूकेँ बुझयमे आबि गेल अछि। आगा बिहारमे विधानसभा चुनाव सेहो अछि। एहि सभकेँ देखैत दुनू दल एखनि एक-दोसराक प्रति समर्पण देखा रहल अछि, एहेनमे मोदीक ई बिहार दौरा कतेक कारगर होएत से सभक उत्सुकता छैक। मोदी बिहारकेँ की कोनो पैघ भेंट देताह वा बस औपचारिकता दौरा रहत, तकर अनुमान लगाओल जा रहल अछि, ओना संभावना ई अछि जे बिहार केर किछु विशेष भेटत।
जीतक बाद पहिल बेर पीएम मोदी १९ जूनकेँ पटना आबि रहल छथि। एकर तैयारी जोर-शोरसँ चलि रहल अछि। एनडीएमे बहुत उत्साह अछि किएक तऽ केंद्र सरकारमे बिहारक महत्वपूर्ण भूमिका अछि।
लोकसभा चुनाव २०२४ मे राजगक जीतक बाद केन्द्रमे तेसर बेर मोदी सरकारक गठन भेल अछि। केंद्र सरकारमे सीएम नीतीशक महत्वपूर्ण भूमिका अछि। नीतीश कुमार सेहो पीएम मोदीकेँ तेसर बेर प्रधानमंत्री बनबाक जोरदार समर्थन केलखिन। जीतक बाद आब पहिल बेर दुनू नेता पटनामे मंच साझा करताह।
दरअसल, पीएम मोदी १९ जूनकेँ पटना आबि रहल छथि, जतय बिहारमे एनडीए केर सब पैघ नेता उपस्थित रहताह। सीएम नीतीश सेहो पीएम मोदीक कार्यक्रममे शामिल हेताह।
