केसी त्यागीक बयान केर खारिज करैत संजय झा कहलनि कि हमर पार्टी लग एहन कोनो जानकारी नहिं अछि आ ने मुख्यमंत्रीकेँ एहि बारेमे किछु पता अछि। एनडीए संसदीय दलक बैसारमे मुख्यमंत्री नीतीश कुमार मोदीक नामक समर्थन कयलनि।
जदयू राज्य सभाक सांसद संजय झा अपन पार्टीक वरिष्ठ नेता के.सी. त्यागीक दावाकेँ खारिज कऽ देलनि, जाहिमे ओ कहने रहथि जे इंडिया गठबन्धन नीतीश कुमारकेँ प्रधानमन्त्रीक पदक प्रस्ताव देलक अछि।
संजय झा किछु घंटा बाद केसी त्यागीक एहि बयान केर खारिज करैत कहलनि कि हमर पार्टी लग एहन कोनो जानकारी नहिं अछि आ ने मुख्यमंत्रीकेँ एहि बारेमे किछु पता अछि।
ओ कहलनि, “हम ई स्पष्ट करय चाहैत छी जे हमर जानकारीमे एहन कोनो बात नहिं अछि। झा कहलनि जे मुख्यमंत्री नीतीश कुमार भाजपाक नेतृत्ववला एनडीए संसदीय दलक बैसारमे “स्पष्ट” रूपसँ मोदीक समर्थन कयलनि। ओ कहलनि जे बिहारमे ई चुनाव गठबंधनक अन्तर्गत लड़ल गेल छल। बिहारमे एनडीए ४० सीटमे सँ ३० सीट जीतल अछि।
जदयू केर वरिष्ठ नेता आ प्रवक्ता केसी त्यागी कहलनि कि लोकसभा चुनावक परिणाम घोषित भेलाक बाद इंडिया गठबंधनक लोक नीतीश कुमारकेँ प्रधानमंत्री पदक पेशकश कयलक। मुदा पार्टी एकरा ठुकरा देलक। जे नीतीश कुमारकेँ अपन गठबंधनक संयोजक नहिं चाहैत छलाह ओ हुनका प्रधानमन्त्री पदक प्रस्ताव देलनि मुदा पार्टी नेतृत्व एहि प्रस्तावकेँ अस्वीकार कऽ देलक।
कांग्रेस केसी त्यागीक एहि दावाक खण्डन कयलक। कांग्रेस महासचिव केसी वेणुगोपाल कहलनि जे हुनका लग एखन धरि एहन कोनो जानकारी नहिं अछि जे नीतीश कुमारकेँ इंडिया गठबंधन द्वारा प्रधानमंत्रीक पदक प्रस्ताव देल गेल छल। जेडीयू केर प्रवक्ता केसी त्यागी जवाब देलनि, “नीतीश कुमार इंडिया गठबंधनक संस्थापक छथि। जखन कांग्रेस पार्टी राजनीतिक रूपसँ अछूत छल तखन आम आदमी पार्टी, समाजवादी पार्टी, बीआरएस आ टीएमसीक नेता हुनका सङ्ग बैसबाक लेल तैयार नहिं छलाह, मुदा नीतीश कुमार पटनामे बैसि ओहि अन्तरकेँ पाटि देलनि। इंडिया गठबंधनसँ नीतीश कुमारकेँ प्रधानमन्त्री पदक प्रस्ताव देल गेल छल। एकर सबूत हमरा लग मोबाइल फोनमे अछि।
