जानकी नवमी आइ, होएत पूजनोत्सव

घर घर माता सीताक पूजनक विद्यापति सेवा संस्थान कऽ रहल आह्वान
*
दरभंगा समदिया
*

धरती पुत्री माँ जानकी केर प्राकट्य दिवस विद्यापति सेवा संस्थानक तत्वावधानमे शुक्र दिन, 17 मईकें धूमधामसँ मनायल जायत। संस्थानक प्रधान कार्यालय परिसरमे प्रातः काल माता जानकीक प्रतिमाक शास्त्रीय विधिसँ पूजा-अर्चना उपरांत मैथिली दिवस समारोहक भव्य आयोजन होयत। आयोजनसँ संबंधित चलि रहल तैयारी अंतिम चरणमे अछि।
जानकारी दैत विद्यापति सेवा संस्थानक महासचिव डा बैद्यनाथ चौधरी बैजू बतेलनि जे जानकी नवमी पर घर-घर जानकी पूजनोत्सव सुनिश्चित करबाक लेल संस्थानक दिससँ धनुषधारिणी माँ जानकी केर कैलेंडर सभ घरमे वितरित कयल जा रहल अछि। ओ बतेलनि जे जानकी नवमी पर आयोजित संस्थानक मैथिली दिवस समारोहमे संस्थानक संरक्षक द्वय क्रमशः ललित नारायण मिथिला विश्वविद्यालयक कुलपति प्रो संजय कुमार चौधरी आ कामेश्वर सिंह दरभंगा संस्कृत विश्वविद्यालयक कुलपति प्रो लक्ष्मी निवास पांडेयकेँ संगहि जगतगुरु रामभद्राचार्य दिव्यांग विश्वविद्यालय, चित्रकूटक कुलपति प्रो शिशिर पांडेय, बीएन मंडल विश्वविद्यालय, मधेपुराक कुलपति प्रो विमलेंदु शेखर झा, कामेश्वर सिंह दरभंगा संस्कृत विश्वविद्यालयक पूर्व कुलपति द्वय प्रो शशिनाथ झा एवं प्रो देव नारायण झा आदिक गरिमामयी उपस्थिति रहत। प्रातः कालीन वेलामे जानकी पूजनोत्सव केर संगहि मैथिल ललना लोकनि माँ जानकी केर छवि मिथिला चित्रकलामे उकेरती। एहिमे प्रदर्शन केर आधार पर तीन उत्कृष्ट कलाकारकेँ क्रमशः प्रथम, द्वितीय आ तृतीय पुरस्कारसँ नवाजल जायत। जखन कि शेषक बीच सहभागिता प्रमाण पत्र वितरित कयल जायत।
डा बैजू बतेलनि जे संस्थान अनेक दशकसँ जानकी नवमीक आयोजन करैत आबि रहल अछि। जखन कि पछिला एक दशकसँ बेसी समयसँ मूर्ति पूजा सेहो कयल जा रहल अछि आ जानकी नवमी केर विस्तार-अभियान निरंतर प्रगति कऽ रहल अछि। आइ राष्ट्रीय स्तर पर हजारो स्थान पर जानकी नवमी समारोहपूर्वक मनाओल जयबाक क्रम आरंभ भऽ चुकल अछि। ओतहि अमेरिका, जर्मनी, कैलिफोर्निया, रूस आदि देशमे सेहो प्रवासी मिथिलावासी जानकी नवमी केर भव्य आयोजन कऽ रहल छथि।
एहि अवसर पर आयोजित होबय बला जानकी-सम्मेलन केर संयोजिका डा सुषमा झा बतेलनि जे एहि सम्मेलन लेल मिथिलाक नारी शक्ति विशेष रूप सँ उत्साहित छथि आ सभ माय-बहिनकेँ एहिमे शामिल होयबाक लेल वृहस्पति दिन मुनहाइर साँझ धरि जनसंपर्क अभियान चलाओल गेल। एहि अवसर पर नारी सशक्तिकरणक क्षेत्रमे उत्कृष्ट योगदान लेल संस्थान द्वारा प्रतिवर्ष देल जाय बला जानकी सम्मानक संगहि राज्यसभा सदस्य केर रूपमे मैथिलीमे शपथ ग्रहण केनिहार सांसदक अभिनंदन आ मैथिली सेवी सम्मान प्रदान कयल जायत।