चोर रातिमे लाखोक गहना चुरा लऽ उड़ल

सुपौल समदिया
*

राघोपुर थाना क्षेत्रक सिमराही बाजारक वार्ड नम्बर ०७ मे स्थित करजाइन रोडमे रविदिन राति चोरीक घटना चोर कयलक। जखन पीड़ित घरक मालिक भोरे उठलाह तखन ओ देखलनि जे चोर अलमारी तोड़ि गहना लऽ गेल छल। राघोपुर थानामे देल गेल आवेदनमे पीड़ित इंद्र भूषण कहलखिन कि लगभग 5.80 लाख रुपयाक गहना आ मोबाइल फोन चोरी भेल । पीड़ित सिमराही बाजारक गोल बाजारमे श्रृंगारक दोकान चलबैत अछि आ ओकर पत्नी घरमे ब्यूटी पार्लर चलबैत छथि। ओ कहलखिन जे ओ सभ रातिमे रात्रि भोजन खएलाक बाद सुति गेलाह। जखन ओ भोरे उठलाह तखन दोसर कोठरीमे चीजसभ बिखरल छल। देखलक जे कोठरीक खिड़कीक ग्रिल काटि देल गेल छल आ अलमारीक लॉकर टूटि गेल छल। लॉकरसँ गहना आ नगदी गायब छल। एहि मामिलाक संबंधमे थाना प्रमुख नवीन कुमार कहलनि जे प्राप्त आवेदनक आधार पर कारवाई कयल जायत। वर्तमानमे पीड़ित व्यवसायीक घर आ आसपासक सीसीटीवी कैमराकेँ स्कैन कऽ जाँच शुरू कयल गेल अछि।

सुपौलक भीमपुर थाना अन्तर्गत रानीपट्टी नहर रेलवे ढाला लग १५ अप्रैलकेँ बंधन बैंकक एकटा कर्मचारीक सङ्ग ९.९५ लाख टाकाक डकैतीक मामलामे पुलिस एकटा पैघ सफलता प्राप्त कयलक अछि। पुलिस एहि मामिलाक जाँचक क्रममे एकटा शातिर अपराधीकेँ गिरफ्तार कयलक अछि, जकरासँ पिस्तौल आ गोली सहित आन सामान बरामद कयल गेल अछि। गिरफ्तार अपराधी सोनेलाल यादव उर्फ सोनू यादव निवासी बरमोतरा, राघोपुर थानाक वार्ड नम्बर ०६ केर अछि। पुलिस अधीक्षक शैशव यादव सोम दिन एहि संबंधमे जानकारी देलनि।