केन्द्रीय गृह मंत्री अमित शाह बुधदिन आरोप लगओलनि जे पश्चिम बंगालक मुख्यमंत्री ममता बनर्जी २०२२ केर भूपतिनगर विस्फोट मामिलाक अभियुक्तकेँ बचा रहल छथि आ राष्ट्रीय जांच एजेंसी (एनआईए)क अधिकारीसभकेँ फंसाबयकेँ कोशिश कऽ रहल छथि।
बालूरघाटसँ पार्टीक उम्मीदवार आ पश्चिम बंगाल भाजपा अध्यक्ष सुकान्त मजूमदारक समर्थनमे दक्षिण दिनाजपुर जिलामे एकटा रैलीकेँ सम्बोधित करैत केन्द्रीय गृहमंत्री कहलनि, “ओतय एकटा विस्फोट भेल छल। की विस्फोटक आरोपीक खिलाफ कार्रवाई जरूरी नहिं अछि ? मुदा जखन एनआईएक अधिकारी लोकनि एहि मामिलाक जाँच शुरू कयलनि आ हुनका सभ पर हमला कयल गेल, तखन मुख्यमंत्री केन्द्रीय एजेन्सीक अधिकारीसभक विरुद्ध मामिला दर्ज कऽ जाँच अधिकारीकेँ फंसाबयकेँ कोशिश कऽ रहल छथि।”
ओ कहलनि जे चूँकि एनआईएक अधिकारी कलकत्ता उच्च न्यायालयक आदेशपर मामिलाक जाँच कऽ रहल छथि, तेँ ओ विस्फोटक पाछाँ आरोपी व्यक्तिक विरुद्ध उचित कार्रवाई करत।
केन्द्रीय गृह मंत्री पड़ोसी देशसँ पश्चिम बङ्गालमे लोकक आगमनकेँ लऽ कऽ मुख्यमंत्री आ सत्तारूढ़ तृणमूल कांग्रेस पर तीक्षण हमला कयलनि। ओ कहलनि, “मुख्यमंत्री अवैध अप्रवासीक खिलाफ कहियो कोनो ठोस कार्रवाई नहिं करतीह। ओ सभ हुनकर पार्टीक वोट बैंक अछि। असममे पहिने सेहो अवैध प्रवासक समस्या छल, मुदा आब भाजपाक सत्तामे अयलाक बाद ई पूर्ण रूपसँ बन्द भऽ गेल अछि। एहि लेल हम आइ कहि रहल छी जे जँ आबयवला दिनमे भाजपा राज्यमे सत्तामे आबि जायत तँ पश्चिम बंगालमे सेहो अवैध पलायन पूर्ण रूपसँ रोकि देल जायत।”
अमित शाह कहलनि जे मुख्यमंत्री अपन तुष्टीकरणक राजनीतिक कारण तीन तलाक व्यवस्था समाप्त करबाक वा सीएए अनबाक विरोध करैत छथि। ओ कहलनि, “तीन तलाकक उन्मूलनसँ लाखो अल्पसंख्यक महिलाकेँ राहत भेटल अछि। सीएए अधिसूचनाक उद्देश्य धार्मिक कट्टरताक शिकार शरणार्थीसभकेँ नागरिकता प्रदान करब अछि।”
अन्तमे अमित शाह कहलनि जे भाजपाकेँ राष्ट्रीय स्तर पर ३७० सँ बेसी आंकड़ा प्राप्त करबाक लेल पश्चिम बङ्गालमे ३० केर आंकड़ा पार करय पड़त।
