भारतीय जनता पार्टी (भाजपा) लगातार कांग्रेसक घोषणापत्र पर हमला कऽ रहल अछि। भाजपा कांग्रेसक घोषणापत्रकेँ मुस्लिम लीगसँ प्रभावित बतबैत रहल अछि। एम्हर कांग्रेसक पूर्व अध्यक्ष राहुल गांधी अपन घोषणापत्र पर सवाल उठयबाक लेल भाजपा आ प्रधानमंत्री नरेन्द्र मोदी पर निशाना साधलनि अछि।
राहुल गाँधी सोशल मीडिया प्लेटफॉर्म एक्स पर पोस्ट कयलनि, “ई चुनाव दू विचारधाराक बीचक लड़ाई अछि। एक दिस कांग्रेस अछि, जे सदैव भारतकेँ एकजुट कयलक आ दोसर दिस ओ छथि जे सदैव लोकसभकेँ विभाजित करबाक प्रयास कयलनि अछि। इतिहास गवाह अछि जे के देशक विभाजन चाहय बला ताकतक संग हाथ मिला कऽ ओकरा मजबूत कयलक आ के देशक एकता आ स्वतंत्रताक लेल लड़ल।”
राहुल आगू लिखलनि “भारत छोड़ो आन्दोलन’क समय अङ्ग्रेजक सङ्ग के ठाढ़ छल ? जखन भारतक जेल कांग्रेसक नेतासँ भरल छल, तखन देशकेँ विभाजित करयवला शक्तिक संग राज्य सभमे के शासन कऽ रहल छल ? राजनीतिक मंचसँ ‘झूठक बौछार’ कयलासँ इतिहास नहिं बदलत।”
एहिसँ पहिने कांग्रेसक राष्ट्रीय अध्यक्ष मल्लिकार्जुन खड़गे कांग्रेसक घोषणापत्रमे प्रधानमंत्री मोदीक मुस्लिम लीगक सन्दर्भक जवाब देने छलाह। मल्लिकार्जुन खड़गे कहने छलाह जे नरेन्द्र मोदी आ अमित शाह आ हुनक मनोनीत अध्यक्ष आइ कांग्रेसक घोषणापत्रक विषयमे गलत धारणा फैला रहल छथि। ओ इहो कहने छलाह जे पीएम मोदीक भाषणमे मात्र आरएसएसक बू आबैत अछि।
बतबैत चली जे प्रधानमंत्री मोदी कांग्रेसक घोषणापत्रकेँ चुनावी रैलीमे झूठक पुलिंदा बतौलनि। ओ कहलनि जे कांग्रेसक घोषणापत्रक प्रत्येक पृष्ठ भारतकेँ टुकड़ा-टुकड़ा करबाक बू मारैत अछि। कांग्रेसक घोषणापत्र ओही सोचकेँ प्रतिबिम्बित करैत अछि जे स्वतन्त्रताक समय मुस्लिम लीगमे छल। कांग्रेस आइ मुस्लिम लीगक विचार भारत पर थोपय चाहैत अछि।
