अपराध पटनामे वकीलक घर पर उपद्रवी फेकलक बम, पसरल दहशत April 9, 2024 Maithil Punarjagran Prakash पुलिस कहलक पटाखा विस्फोट * पटना * राजधानी पटनाक कंकड़बागमे उपद्रवीसभ एकटा क्रिमिनल लाॅयरक घर पर बम फेंकलक। कहल जा रहल अछि जे उपद्रवी सभ पहिने ओकीलकेँ फोन कऽ धमकी देलक आ फेर बम घरक बाहर फेंकि देलक। ओतहि पुलिस एकरा पटाखा विस्फोट कहि रहल अछि। फेंकल गेल बमक आवाजसँ क्षेत्रमे हड़कंप मचि गेल। इलाकामे दहशतक माहौल छल। घटनाक सूचना भेटलाक बाद पुलिस घटनास्थल पर पहुँचल आ मामिलाक जाँच चलि रहल अछि। पुलिस एहि घटनाक कारणक पता लगयबाक प्रयास कऽ रहल अछि। ई मामिला पत्रकार नगर थाना क्षेत्रक कंकड़बाग डॉक्टर्स कालोनीक अछि। कहल जा रहल अछि जे मोटरसाइकिल पर सवार दूटा युवक आबि ओकीलक घरक सोझाँ बम विस्फोट कऽ घटनास्थलसँ भागि गेल। पूरा घटना सीसीटीवी कैमरामे कैद भऽ गेल। पुलिस सीसीटीवी फुटेजक सहायतासँ बदमाशकेँ पकड़बाक प्रयास कऽ रहल अछि। वकील डॉ. प्रियदर्शी अपन परिवारक संग कंकड़बाग डॉक्टर्स कॉलोनीमे विधापुरी पार्कक ठीक बगलमे ओ/९० घरमे रहैत छथि। ओ पछिला २०-२२ सालसँ पटना सिविल कोर्टमे आपराधिक वकीलक रूपमे प्रैक्टिस कऽ रहल छथि। एहि मामिलामे वकील डॉ. अभिषेक प्रियदर्शी कहलनि जे ई घटना हुनका डरयबाक लेल कयल गेल अछि। ओ बतौलनि जे रविदिन राति ओ अपन मुवक्किल पटना आयुक्तालयक उपायुक्त सूरज कुमारक संग घरमे स्थित कार्यालयमे उपस्थित छलाह। एहि दौरान ओ बाहर एकटा जोरगर आवाज सुनलनि। जखन हम बाहर निकललहुं तखन गेट लग धुआं उठि रहल छल। तखन हुनक स्टेनो रोहित कुमार बतौलनि जे दूटा युवक बाइकसँ आबि बम पटकि कऽ भागि गेल। कहल जा रहल अछि जे पुलिस ओहि बाइकक पहिचान कऽ लेलक अछि जाहि पर उपद्रवी सवार भऽ आयल छल। ओतहि पत्रकार नगरक थाना प्रमुख बम विस्फोटक खण्डन कयने छथि। ओ कहलनि अछि जे ई बम विस्फोट नहिं अछि बल्कि घरक सोझाँ पटाखा विस्फोट भेल अछि। पुलिस एहिमे शामिल शरारती तत्वक पहचान कऽ रहल अछि। मोटरसाइकिलक पहचान कए लेल गेल अछि। जल्दीए बदमाशक पहिचान सेहो कय लेल जायत। पुलिस मामिलाक छानबीन कय रहल अछि। Spread the love
