तेज रफ़्तार कार केर आमने सामने टक्कर

झंझारपुर समदिया
*

काल्हि भोरमे लगभग ७ बजे केर आसपासमे दू टा कार आमने सामने टकरा गेल। टक्कर कमला नदीक पुबरिया तटबंध पर बनल सड़क जे एनएच 57 सँ उत्तर (अन्धराठाढ़ी) के तरफ जाइत अछि ओहि ठाम अवस्थित गाम महरैलक चौमुहाना पर भेल। प्रत्यक्षदर्शीक मोताबिक मारुती सुजुकी केर कार बीआर32एपी6173 जे अन्धराठाढ़ीसँ एनएच 57 केर तरफ तेज गतिमे जा रहल छल ओकर टक्कर सामनेसँ तेज गति मे आबि रहल महिंद्राक स्कार्पियो डीएल4सीएनबी1661 सँ भऽ गेल।
कारमे सवार महिलाकेँ बहुत बेसी चोट आयल छल। ग्रामीणक मददसँ घायलकेँ सदर अस्पताल मधुबनी पठाओल गेल। कारक ड्राइवर सीट बेल्ट लगने छल जाहि कारणसँ ड्राइवर सुरक्षित छल। स्कार्पियोक चालक मौकासँ तुरंत फरार भऽ गेल। एही घटना केर जानकारी तुरंत रुद्रपुर थानाकेँ देल गेल। मुदा मौका पर आबयमे प्रशासन केर विलम्ब भेल तऽ 112 पर कॉल कऽ सेहो जानकारी देल गेल, मुदा लगभग 2 घंटाक विलम्बसँ रुद्रपुर थाना घटना स्थल पर पहुँचल। तकर बाद पूछताछ आ अन्य कानूनी प्रक्रिया आरम्भ भेल। समाचार सम्प्रेषण तक घायल महिलाक हालत नाजुक बनल छल।