भाजपाक राष्ट्रीय अध्यक्ष जेपी नड्डा सोनिया गाँधी, राहुल गाँधी आ मल्लिकार्जुन खड़गेक आरोपक जवाब दैत कहलनि अछि जे कांग्रेसक नेता ऐतिहासिक पराजयक आशंकासँ भारतीय लोकतंत्र आ संस्थानक विरुद्ध बयान देलनि अछि। ओ व्यंग्यात्मक रूपसँ इहो कहलनि जे कांग्रेसक दिवालियापन आर्थिक नहिं अछि, बल्कि कांग्रेस पार्टी नैतिक आ बौद्धिक रूपसँ दिवालिया भऽ गेल अछि।
नड्डा एक्स पर एकटा पोस्टमे कहलनि, “कांग्रेसकेँ जनता पूर्ण रूपसँ खारिज कऽ देतनि आ ऐतिहासिक हारक आशंकासँ हुनकर शीर्ष नेतृत्व एकटा संवाददाता सम्मेलनकेँ सम्बोधित कऽ भारतीय लोकतंत्र आ संस्थानक विरुद्ध बयान देलक अछि। ओ सुविधाजनक रूपसँ अपन अप्रासंगिकताकेँ ‘वित्तीय परेशानी’ पर दोष मढ़ि रहल छथि।
दरअसल, हुनकर दिवालियापन आर्थिक नहिं अछि, बल्कि नैतिक आ बौद्धिक अछि। कांग्रेस अपन गलती सुधारबाक बदला अपन समस्याक लेल अधिकारीसभकेँ दोषी ठहरा रहल अछि। चाहे ओ आईटीएटी हो या दिल्ली उच्च न्यायालय, ओ कांग्रेसकेँ नियमक पालन करब आ बकाया करक भूगतान करय लेल कहलक। मुदा पार्टी कहियो इ नहिं कयलक।”
भ्रष्टाचारकेँ लऽ कऽ कांग्रेस पर तीक्षण हमला करैत नड्डा आगू कहलनि, “जे पार्टी हर क्षेत्र, हर राज्य आ इतिहासक प्रत्येक पलमे लूट कयलक अछि, ओकरा लेल वित्तीय असहायताक बात करब हास्यास्पद अछि। “जीपसँ लऽ कऽ हेलीकॉप्टर घोटाला
आ बोफोर्स तक कांग्रेस अपन चुनाव प्रचारमे सभ घोटालासँ एकत्रित धनक उपयोग कऽ सकैत अछि।
पार्ट टाइम कांग्रेसी नेता सभक कहब छनि जे भारतक लोकतंत्र होयब झूठ अछि, की हम विनम्रतापूर्वक हुनका सभकेँ मोन पाड़ि सकैत छी जे १९७५ सँ १९७७ केर बीच मात्र किछु मास धरि भारतमे लोकतंत्र नहिं छल आ ओहि समय भारतक प्रधानमन्त्री कोनो आओर नहिं बल्कि इन्दिरा गाँधी छलीह।”
