१९९० केर दशकमे अशोक महतो आ अखिलेश सिंह गिरोह नवादा, नालन्दा आ शेखपुरा क्षेत्रपर हावी छल। २०० सँ बेसी गाम प्रभावित भेल। अशोक महतो कतेको नरसंहार सहित जेल ब्रेक कांडक आरोपी रहल छथि।
बिहारक नवादाक नालंदा क्षेत्रक बाहूबली अशोक महतो ६० वर्षक आयुमे विवाह कयलनि। दरअसल, अशोक महतो एहि बेर बिहारक मुंगेर लोकसभा क्षेत्रसँ अपन भाग्य आजमाबय चाहैत छथि। मुदा हुनका डर अछि जे जँ हुनकर नामांकन कतहु रद्द ने भऽ जाय, तेँ ओ मंगलदिन जल्दबाजीमे अनिता देवीसँ विवाह कयलनि आ आब अनिता महागठबंधनक सम्भावित उम्मीदवार भऽ सकैत छथि।
नवादा जिलाक पकरीबरावां थाना क्षेत्रक बढ़ाना गामक निवासी अशोक महतोक विवाह ६० वर्षक आयुमे भेल अछि। अशोक महतोक विवाह लखीसराय जिलाक कुमारी अनिता नामक लड़कीसँ भेल अछि। ओना एखन विवाहक कोनो लग्न नहिं चलि रहल अछि, मुदा ई विवाह चुनावी मुहूर्तक अनुसार भेल अछि।
अशोक महतो कहलनि अछि जे ओ राजदसँ चुनाव लड़य चाहैत छथि। एहि लेल ओ विवाह कयलनि अछि।
अशोक महतोकेँ २००१ केर जेल ब्रेक मामिलामे आजीवन कारावासक सजा सुनाओल गेल छल। १७ सालक बाद अशोक महतो दिसम्बर २०२३ मे जेलसँ रिहा भऽ गेलाह। एकर बाद अशोक महतोक विवाह करबाक निर्णय चुनावी निर्णय मानल जा रहल अछि।
अशोक महतोक प्रतिद्वंद्वी अखिलेश सिंहक पत्नी अरुणा देवी चारि बेर वारसलीगंज क्षेत्रसँ विधायक चुनल जा चुकल छथि। दोसर दिस अशोक महतोक संग रहनिहार प्रदीप महतो सेहो दू बेर विधायक रहि चुकल छथि। एहनमे जेलसँ बाहर आबि वियाहक फैसला कहल जा रहल अछि जे ओ आब चुनावी राजनीतिमे उतरि गेल छथि। कहल जा रहल अछि जे ओ राजदक तरफसँ लोकसभा चुनाव लड़ताह।
