नीतीश कुमार सोमक राति दिल्ली पहुंच रहल छथि। भारतीय जनता पार्टी आ बिहार राजगक अन्य सहयोगी दलक बीच अंतिम वार्ता लोकसभा सीट समझौता पर होबयवला अछि। बिहारमे लोकसभाक कुल ४० सीट अछि। जानकारीक अनुसार भाजपा १७/१८ सीट आ जेडीयू १५/१६ सीट पर सहमत भऽ सकैत अछि।
बिहारक मुख्यमंत्री नीतीश कुमार एनडीए दलक बीच सीट बंटवारा पर चर्चा करबाक लेल सोमक राति दिल्ली पहुंचताह। नीतीश कुमार २ दिन १९-२० मार्च दिल्लीमे रहताह आ २१ मार्च कऽ दुपहरियामे पटना घुरि अयताह।
भाजपाक तरफसँ मंगल पांडेय आ सम्राट चौधरी दिल्लीमे प्रदेश प्रभारी विनोद तावड़ेक संग अंतिम बैठक करत। एखन धरि उपलब्ध जानकारीक अनुसार भाजपा १७/१८, जदयू १५/१६, लोजपा (आर) ५, उपेन्द्र कुशवाहा १, जीतन राम मांझी १ सीट पर चुनाव लड़त।
मुख्यमंत्री नीतीश कुमार आ भाजपाक शीर्ष नेतृत्वक बीच मुख्य वार्ता बिहारमे ३/४ सीटक अदला-बदली पर होयबाक अछि। जानकारीक अनुसार जेडीयू केर २ सीट काराकाट आ गया क्रमश: उपेंद्र कुशवाहा आ जीतन राम मांझीकेँ देल जा सकैत अछि। एहि स्थितिमे नीतीश कुमारक पार्टीकेँ कोन दूटा सीट देल जायत, ई एखन धरि तय नहिं भेल अछि।
काराकाट आ गयाक अतिरिक्त शिवहर आ औरंगाबादक सीट पर एखन धरि वार्ता नहिं भेल अछि। आनंद मोहनक पत्नी लवली आनन्दकेँ शिवहर वा औरंगाबाद सीटसँ टिकट देबाक चर्चा भऽ सकैत अछि। ई दुनू सीट भाजपाक अछि।
एकर अलावा एहि बेर सीतामढ़ी वा शिवहरसँ भाजपा प्रत्याशीक रूपमे जदयू केर वर्तमान सांसद सुनील पिंटूकेँ टिकट देबाक मुद्दा पर चर्चा भऽ सकैत अछि। चिराग पासवान वाल्मीकि नगर सीटक माँग कऽ रहल छथि, जे एखन जदयू लग अछि।
