पटनामे एकटा जनसभाकेँ सम्बोधित करैत अमित शाह विपक्ष पर हमला करैत कहलनि जे राजद आ कांग्रेस दुनू घपला-घोटाला करयवाली पार्टी अछि। राजद चारा घोटाला, वर्दी घोटाला, पाइप घोटाला, रेलवे होटलक आवंटनमे घोटाला, बालू घोटाला आ अरबों रुपयाक बेनामी संपत्ति बेटा-बेटीक नाम कयलक। कांग्रेस कॉमनवेल्थ घोटाला, कोयला घोटाला, २जी घोटाला, अगस्ता वेस्टलैंड घोटाला, चिटफंड घोटाला आदि कयलक। मोदी पर एक पैसाक भ्रष्टाचारक आरोप नहिं अछि।
गृहमंत्री अमित शाह कहलनि जे कांग्रेस पार्टी सदैव अपन परिवारक सम्मान कयलक आ लालू यादव सेहो अपन पूरा जीवन पिछड़ाक नाम पर अपन परिवारक लेल जीलाह। कांग्रेस नेता सोनिया गाँधीक एकमात्र उद्देश्य राहुल गाँधीकेँ प्रधानमन्त्री बनायब अछि आ लालू यादवक एकमात्र उद्देश्य अपन बेटाकेँ मुख्यमन्त्री बनयब अछि। जे अपन बेटा-बेटीकेँ प्रधानमंत्री आ मुख्यमंत्री बनबय चाहैत छथि, की ओ अहाँक बेटा-बेटीक भलाई कऽ सकैत छथि ?
मोदी २५ करोड़ लोककेँ गरीबी रेखासँ बाहर निकालय केर काज कयलनि, मोदी ८० करोड़ लोककेँ ५ किलो मुफ्त अनाज देबाक काज कयलनि, मोदी १२ करोड़ गरीबकेँ शौचालय उपलब्ध करय केर काज केलखिन, मोदी ४ करोड़ गरीबकेँ आवास उपलब्ध कराबय केर काज केलखिन, मोदी उज्ज्वलाक तहत १० करोड़ गरीब मांकेँ गैस सिलेंडर देबाक काज केलखिन। मोदी १४ करोड़सँ बेसी घरमे नलक पानि पहुँचयबाक काज कयलनि।
