ऐतिहासिक बजट प्रस्तुत करबाक लेल मुख्यमंत्री आ उपमुख्यमंत्री बधाईक पात्र : डॉ. आलोक रंजन
*
सहरसा समदिया
*
पूर्व मंत्री सह विधायक डॉ. आलोक रंजन बिहार विधान सभामे २ लाख ७८ हजार करोड़क बजट पेश करबा पर मुख्यमंत्री आ दुनू उपमुख्यमंत्रीकेँ बधाई आ शुभकामना बधाई दैत खुशी व्यक्त कयलनि अछि। डॉ रंजन कहला जे एकटा व्यापक, पारदर्शी आ दूरदर्शी बजट करबाक लेल उपमुख्यमंत्री सह वित्त मंत्री सम्राट चौधरी बधाई केर पात्र छथि। वित्त मंत्री बिहारमे वित्तीय वर्ष 2024-25 केर बजट विधानसभामे पेश कयलनि अछि। एहि बेर दू लाख 78 हजार करोड़क बजट पेश कयल जा गेल अछि। बजटमे रोजगार आ शिक्षा पर विशेष ध्यान देल गेल अछि। बिहारमे गरीबी दरमे 8 प्रतिशतक कमी आयल अछि। 2 करोड़सँ बेसी लोक गरीबीसँ बाहर भऽ गेल अछि। वित्तीय संतुलन केर ध्यानमे राखि कए इ बजट बनाओल गेल अछि। सात निर्णय एक आ दू पूरा राज्यमे लागू होएत। राज्यमे पर्यटन बढ़ेबा लेल सात निश्यय दू लेल पांच हजार चालीस करोड़ टका, स्टूडेंट क्रेडिट कार्ड लेल सात सौ करोड़ टका जोड़ल गेल अछि। संगहि पर्यटनमे निवेश पर सब्सिडीक प्रावधान सेहो कयल गेल अछि।ओतही कृषि केर क्षेत्रमे रिकॉर्ड उत्पादनक लक्ष्य, अन्य रोजगारक संग-संग आईटी क्षेत्रमे रोजगारक बहुत वृद्धि होयत। एहि बजटमे सौर ऊर्जाक उपयोग केर बढ़ावा देल गेल अछि आ इलेक्ट्रिक वाहन नीतिकेँ लागू कयल गेल अछि।सामाजिक क्षेत्रक संग संग महिला सशक्तिकरण पर जोर देल गेल अछि। ओ कहलनि जे एनडीए सरकार चौतरफा विकासक मुद्दा पर काज कय रहल अछि आ आगू सेहो डंकाक चोट पर करत। संगहि देशमे प्रधानमंत्रीक गारंटी अछि जे हम सब जे कहब से करब। तहिना बिहारमे सेहो एनडीए सरकार मुख्यमंत्री नीतीश कुमार आ उपमुख्यमंत्री सम्राट चौधरी आ विजय सिंहा न्यायक संग विकासक बाट पर आगू बढ़ि रहल अछि। बिहारक विकास दर आन राज्यसँ आगू अछि।सकल घरेलू उत्पादमे डेढ़ गुनाक बढ़ोतरी भेल अछि। इ आत्मनिर्भर बिहारक झलक अछि। सामाजिक विकासकेँ शिक्षा, स्वास्थ्य आ आर्थिक विकाससँ जोड़ल गेल अछि। आर्थिक रूपसँ कमजोर 94 लाख परिवारकेँ अधिकतम 2 लाख टकाक अनुदान देबाक फैसलासँ लोकक स्वरोजगारक माध्यमसँ समृद्ध कयल जाएत। हम एक बेर फेर मुख्यमंत्री नीतीश कुमार आ उपमुख्यमंत्री सम्राट चौधरी आ विजय सिंहाकेँ एहि ऐतिहासिक बजट पेश करबा लेल बधाई दैत छी।
