पाकिस्तानक खैबर पख्तूनख्वा प्रांतक टैंक जिलामे बृहस्पतिकेँ एकटा सुरक्षा अधिकारीक हत्या कऽ देल गेल, जतय नव सरकारक चुनावक लेल मतदान चलि रहल अछि। स्थानीय मीडिया ई जानकारी देलक।
खैबर समाचारक अनुसार, सुरक्षा बलक वाहन पर बंदूकधारी द्वारा गोली चलयलासँ सुरक्षा अधिकारीक मृत्यु भऽ गेल।
सुरक्षा सुनिश्चित करबाक लेल मतदान केन्द्रपर हजारो सुरक्षाकर्मी तैनात कयल गेल अछि।
देश भरिमे इंटरनेट सेहो बंद कऽ देल गेल अछि, जकरा सरकार “सुरक्षा उपाय” बतौलक।
कार्यवाहक संघीय सूचना मंत्री मुर्तजा सोलंगी आ पाकिस्तान मुस्लिम लीग (एन) (पीएमएल-एन) प्रमुख शाहबाज शरीफ प्रारम्भिक मतदातमे सँ छल।
सुरक्षा सुनिश्चित करबाक लेल ईरान आ अफगानिस्तानक संग देशक सीमा सील कऽ देल गेल अछि।
मतदानक पूर्व संध्या पर बलूचिस्तान प्रांतक पिशिन आ किला सैफुल्लाहमे दूटा आतंकवादी हमलामे कतेको लोक मारल गेल आ दर्जनों घायल भऽ गेल।
पाकिस्तान तहरीक-ए-इंसाफक संस्थापक इमरान खान बृहस्पतिकेँ अदियाला जेलसँ डाक मतपत्रक माध्यमसँ आम चुनावक लेल वोट देल। स्थानीय मीडिया ई जानकारी देलक। मुदा, खानक पत्नी बुशरा बीबी मतदान नहिं कऽ सकलीह किएक तँ डाक मतपत्रक प्रक्रिया पूरा भेलाक बाद हुनका दोषी ठहराओल गेल आ गिरफ्तार कऽ लेल गेल।
जेल अधिकारीसभक हवालासँ कहल गेल जे मात्र वैध कम्प्यूटरीकृत राष्ट्रीय पहचान पत्र (सीएनआईसी) वला कैदीसभकेँ मतदान करबाक अनुमति देल गेल छल। बुधदिन एक्स पर एकटा पोस्टमे केन्द्रीय सूचना सचिव रऊफ हसन कहने छलाह जे “पूर्व प्रधानमंत्री खान देशक गरिमा, सम्मान आ संप्रभुता बहाल करबाक लेल आ लोकक कल्याण सुनिश्चित करबाक लेल अपन जीवन सहित सब किछु समर्पित कऽ देने छथि। देशक नागरिकक रूपमे हमरासभकेँ ऋण चुकाबय पड़त। देश आ ओकर जनतापर खराब पकड़ रखनिहार सड़ल व्यवस्थाकेँ समाप्त कऽ हमरासभकेँ अपन मतक उपयोग पाकिस्तानक चेहरा बदलबाक लेल करबाक चाही।”
