लैंड फॉर जॉब मामिलामे लालू परिवारक समस्या बढ़ैत नजर आबि रहल अछि। ईडी एक बेर फेर लालू परिवार पर रेलवेमे ‘नौकरीक बदला जमीन’ मामिलामे कार्रवाई कएलक अछि। मनी लॉन्ड्रिंग मामिलामे ईडी राउज एवेन्यू कोर्टमे राबड़ी देवी, मीसा भारती, हेमा यादव आ सात गोटेक खिलाफ आरोपपत्र दाखिल कयलक अछि। ओतहि ईडीक चंगुलक बाद लालू परिवार पर भयंकर राजनीति भऽ रहल अछि। सीबीआई एहि मामिलामे पहिनेसँ तीनटा आरोपपत्र दाखिल कऽ चुकल अछि।
संगहि लालू परिवार पर ईडीक पकड़क बाद केंद्रीय गृह राज्य मंत्री नित्यानंद राय कहलनि कि “सब संस्थान कानूनक अनुसार काज करय लेल स्वतंत्र अछि।
ईडी अपन काज करैत अछि आ जतय भ्रष्टाचार, कदाचार, जतय शक्तिक दुरुपयोग होइत अछि आ आर्थिक अपराध होइत अछि, ईडी ओतए पहुंचत। संगहि ओ कहलनि जे ईडी अपन काज कऽ रहल अछि आ अगर केकरो लगैत अछि जे ईडी की कऽ रहल अछि तखन ओ अपन काज कऽ रहल अछि। कानून सबके लेल समान अछि, कानून केकरो लेल अलग-अलग नहिं भऽ सकैत अछि।”
एहिसँ पहिने पश्चिम बंगालक मुख्यमंत्री ममता बनर्जीक विषयमे नित्यानन्द राय कहने छलाह जे “पूरा अहंकारी गठबन्धन घबरायल अछि। ई लोक हिन्दूक विरोध कऽ, सनातनक विरोध कऽ आ तुष्टीकरणक राजनीति कऽ वोट बटोरबाक तैयारी कऽ रहल छथि। ओतहि आब एहन लोकक दोकान बंद होमय जा रहल अछि आ राजनीति खतम होमय जा रहल अछि।”
ओ आगू कहलनि जे “आब तुष्टीकरणक राजनीति काज नहि करत। भगवान रामक मन्दिर बनाओल जा रहल अछि आ २२ जनवरीकेँ पीएम मोदी प्राण प्रतिष्ठाक पूजा सेहो करताह। मोदी कालमे राम मन्दिरसँ लऽ कऽ घर, शौचालय, स्कूल आ गरीबक लेल अस्पताल धरि सब किछु खुजल अछि। किछु लोक कहि रहल छथि जे भाजपा मंदिर पर राजनीति कए रहल अछि, मुदा भाजपा मंदिरक नाम पर राजनीति किएक करत।”
आब ई देखब रोचक होयत जे नित्यानंद रायक बयान पर लालू परिवारक की प्रतिक्रिया होईत अछि ?
