जनता दल यूनाइटेड (जेडीयू) के राष्ट्रीय अध्यक्ष राजीव रंजन सिंह उर्फ ललन सिंहक इस्तीफाक खबरक बीच आब मुख्यमंत्री नीतीश कुमार आइ भोरे मुख्यमंत्री निवास पर एकटा महत्वपूर्ण बैठक बजौलनि। जाहिमे कतेको मंत्री आ विधायक शामिल छथि। मुख्यमंत्री अपन निवास पर सबके संग बैसार कयलनि। खबर आबि रहल अछि जे नीतीश काल्हि दिल्ली लेल रवाना हेताह। जेडीयू के राष्ट्रीय पदाधिकारीक २८ दिसंबरकेँ दिल्लीमे आ जेडीयूक राष्ट्रीय कार्यकारिणीक बैठक २९ दिसंबरकेँ होबय जा रहल अछि। जाहिमे सीएम नीतीश आ ललन सिंह दुनू शामिल हेताह।
ललन सिंहक इस्तीफाक मुद्दाक बाद पूर्व सांसद आनन्द मोहन आ लवली आनन्द आइ भोरे मुख्यमंत्री निवास पहुँचलाह। एहि बैसारसँ कतेको अर्थ निकालल जा रहल अछि।
नीतीश कुमारक सङ्ग भेँटक बाद पूर्व सांसद आनन्द मोहनकेँ मुख्यमंत्री निवाससँ बाहर ओ कहलनि जे मुख्यमंत्रीक सङ्ग भेँट बहुत नीक रहल। ई शिष्टाचार भेंट छलइ। जनता दलमे कहिया शामिल होयब ई पूछला पर ओ कहलनि, “देखू, एखन एहि मामिलामे किछु नहिं कहल जा सकैछ।
ओतहि मुख्यमंत्री नीतीशसँ भेंट कएनिहार विधान परिषद सदस्य रीना यादव कहलनि जे काल्हि कैबिनेटमे नियोजित शिक्षककेँ राज्य कर्मचारीक दर्जा देल गेल अछि। एकरा लेल हम मुख्यमंत्री नीतीश कुमारसँ भेंट कए बधाई देलहुं। संगहि ओ स्वयं ललन सिंहक इस्तीफाक खण्डन करैत कहलनि अछि जे एहन किछु नहिं अछि। दू दिनक बाद सब किछु पता चलत।
दिल्लीमे होबयवला जेडीयूक राष्ट्रीय कार्यकारिणीक बैसारसँ पहिने पटनामे सीएम हाउसक बाहर हलचल तेज भऽ गेल अछि। जेडीयूक कतेको मंत्री आ विधान पार्षद सेहो विधायक सभक संग नीतीश कुमारसँ भेंट करबाक लेल पहुँचल छथि। ई बैसार तखन भेल जखन नीतीश कुमारक निकट सहयोगी आ जदयूक राष्ट्रीय अध्यक्ष ललन सिंहक इस्तीफा सोझाँ आयल।
