जितिया पर्वक बीच पूर्वी चम्पारणमे हृदयविदारक हादसा, पोखरिमे डूबि चारि बच्चीक मृत्यु
मोतिहारी । समदिया
पूर्वी चम्पारणक पहाड़पुर थाना क्षेत्रक बनकट गाममे शुक्रदिन जितिया पर्वक दौरान पोखरिमे नहाइत चारि बच्चीक डूबलासँ मृत्यु भऽ गेल। हादसाक बाद गाममे शोकक माहौल पसरि गेल।
जानकारीक अनुसार, जितिया पर्वक लेल महिला आ बच्चा सभ स्थानीय पोखरिमे नहाय लेल गेल छल। एहि क्रममे चारि बच्चा पोखरिक गहींर भागमे चलि गेल आ डूबि गेल। स्थानीय लोक सभ खोजबीन कऽ चारू बच्चाकेँ बाहर निकालि पहाड़पुर सामुदायिक स्वास्थ्य केन्द्र पहुँचेबाक प्रयास केलक, मुदा चिकित्सक सभ चारूकेँ मृत घोषित कऽ देलनि।
मृत बच्चाक पहिचान प्रमोद महतोक 13 वर्षीय बेटी सोनामती, 10 वर्षीय बेटी फूलमती, वीरेंद्र महतोक 10 वर्षीय बेटी सोनाली कुमारी आ अच्छेलाल पासवानक 12 वर्षीय बेटी प्रतिमा कुमारीक रूपमे भेल अछि।
घटनाक सूचना भेटिते पहाड़पुर पुलिस घटनास्थल पर पहुँचि जाँच-पड़ताल कएलक। चारू शवकेँ पोस्टमार्टम लेल मोतिहारी पठाओल गेल अछि। प्रशासन द्वारा मृतक बच्चीक परिवारकेँ मुआवजा देबाक प्रक्रिया शुरू कऽ देल गेल अछि।
हादसाक बाद ग्रामीण सभ पोखरिक खतरनाक आ गहींर भागमे चेतावनी बोर्ड लगाबय तथा बैरिकेडिंग करबाक मांग कएने छथि।
