बैठकसँ पहिने बिखरि गेल INDIA गठबंधन : शिवराज
पटना । समदिया
एसआईआरमे कथित गड़बड़ीक आरोपक मुद्दा पर बुधदिन भेल INDIA गठबंधनक बैठककेँ लऽ कऽ केंद्रीय मंत्री शिवराज सिंह चौहान विपक्ष पर तीखा निशाना साधलनि। हुनक दावा अछि जे बैठकसँ पहिनेहें गठबंधन बिखरि गेल, कारण विपक्षक कतेको प्रमुख नेता बैठकमे शामिल नहि भेलाह।
शिवराज कहलनि जे उत्तर प्रदेशमे चुनाव अछि, मुदा अखिलेश यादव, तमिलनाडुमे एमके स्टालिन आ दिल्लीमे अरविंद केजरीवाल बैठकमे नहि देखयलाह। उद्धव ठाकरे वर्चुअल माध्यमसँ जुड़लाह, जखनिकि हेमंत सोरेनक उपस्थिति नहि रहल। ओ व्यंग्य करैत कहलनि—“एक दिलक टुकड़ा हजार भेल, किछु एतय खसल आ किछु ओतय।”
ओ कहलनि जे बैठकक परिणाम “शून्य विजन आ शत-प्रतिशत हताशा” रहल। हुनका अनुसार विपक्ष चुनावसँ पहिनेहें हारिक बहाना खोजि रहल अछि। ‘सेव डेमोक्रेसी’ मार्चकेँ सेहो ओ ‘परिवार बचाओ अभियान’ कहि आलोचना कएलनि।
राहुल-खरगे पर सेहो हमला
प्रेस कॉन्फ्रेंसमे शिवराज कांग्रेस अध्यक्ष मल्लिकार्जुन खरगे आ राहुल गांधी पर सेहो निशाना साधलनि। हुनक आरोप छल जे लगातार चुनावी पराजयक बाद कांग्रेस आत्ममंथन आ जनतासँ माफी माँगबाक बदला भ्रम आ मनगढ़ंत आरोप लगा रहल अछि।
शिवराज दावा कएलनि जे INDIA गठबंधन राहुल गांधीकेँ नेता मानबाक लेल तैयार नहि अछि। हुनक अनुसार कांग्रेसक कार्यसमिति बैठकमे राहुल गांधी स्वयं कहलनि जे हुनका पर भरोसा कएल जाए, मुदा “कांग्रेसकेँ राहुल गांधी पर भरोसा नहि अछि।”
