खरगेक आरोप : नोटबंदीसँ अर्थव्यवस्था, वोटबंदीसँ लोकतंत्र प्रभावित
कांग्रेस कार्यसमिति बैठकमे सरकारक समक्ष पाँच मांग
नई दिल्ली । समदिया
दिल्लीमे मंगलदिन कांग्रेस कार्यसमितिक बैठक भेल। बैठकक बाद कांग्रेस अध्यक्ष मल्लिकार्जुन खरगे सोशल मीडिया पोस्टक माध्यमसँ केंद्र सरकार पर चुनाव प्रक्रिया आ मतदाता सूचीमे पारदर्शिताक कमीकेँ लऽ कऽ गंभीर आरोप लगौलनि। ओ कहलनि जे कांग्रेसक समक्ष लोकतंत्र आ संविधानक रक्षा करबाक जिम्मेदारी फेर ठाढ़ भेल अछि।
खरगे आरोप लगौलनि जे मतदाता सूचीसँ लोकक नाम हटाओल जा रहल अछि आ चुनाव आयोगक कार्यप्रणाली पर सेहो सवाल उठि रहल अछि। हुनकर कहब छल जे मताधिकार लोकतंत्रक आधार अछि आ प्रत्येक मतदाताकेँ अपन वोट सुरक्षित रहबाक भरोसा होयबाक चाही।
कांग्रेसक पाँच मांग
कांग्रेस सरकारक समक्ष मतदाता सूची आ चुनाव प्रक्रियासँ जुड़ल पाँच मांग रखलक अछि –
- मतदाता सूचीमे होबऽवला सभ प्रमुख बदलावक पूरा डेटा सार्वजनिक कयल जाय।
- हटाओल गेल मतदाताक नामक संबंधमे संबंधित लोककेँ सूचना आ अपीलक अवसर देल जाय।
- राजनीतिक दलकेँ मतदाता सूची आ आवश्यक डेटा समय पर सरल प्रारूपमे उपलब्ध कराओल जाय।
- गंभीर विसंगतिक प्रमाण भेटला पर स्वतंत्र आ समयबद्ध जांच कराओल जाय।
- चुनाव प्रक्रियासँ जुड़ल महत्वपूर्ण डेटा आ निर्णयमे पर्याप्त पारदर्शिता सुनिश्चित कयल जाय।
खरगे कहलनि जे कांग्रेस एहि मुद्दाकेँ कोनो चुनाव जीतबाक वा हारबाक लड़ाइ नहि मानैत अछि। हुनकर अनुसार सरकार आ चुनाव बदलैत रहैत अछि, मुदा लोकतंत्र आ संविधान स्थायी अछि। ओ कहलनि जे लोकतंत्रमे सभसँ शक्तिशाली व्यक्ति प्रधानमंत्री वा कोनो सत्ताधारी नेता नहि, बल्कि आम मतदाता होइत छथि।
