थम्हि नहिं रहल, आब समस्तीपुरमे युवती संग अभद्र व्यवहार, चारि गिरफ्तार
एकरो वायरल वीडियो सामने अएला पर पुलिसक कार्रवाई
समस्तीपुर । समदिया
मिथिला क्षेत्रीय बिहारक समस्तीपुर जिलाक कर्पूरीग्राम थाना क्षेत्रक जगतसिंहपुर गांवमे सड़कसँ जा रहल एकटा युवती संग छेड़खानी, गाली-गलौज आ अभद्र व्यवहारक मामिला सामने आएल अछि। घटनाक वीडियो सोशल मीडिया पर वायरल भेलाक बाद पुलिस कार्रवाई करैत मुख्य आरोपी सहित चारि आरोपितकेँ गिरफ्तार कएलक अछि।
जानकारीक अनुसार, युवती बांध बाइपास रोडसँ एकटा युवकक संग जा रहल छल। ओतय किछु युवक ओकरा रोकि गाली-गलौज आ अभद्र व्यवहार करबाक संग छेड़खानी कएलक। युवती अपन बचावमे आरोपित सभक विरोध करैत स्वयं संघर्ष करैत रहल। बादमे ओ कोनो तरहसँ अपन घर पहुंचि परिजनकेँ घटना संबंधी जानकारी देलक।
घटनाक वीडियो वायरल भेलाक बाद पुलिस मामिलाकेँ गंभीरतासँ लैत जांच शुरू कएलक। समस्तीपुरक एसपी अरविंद प्रताप सिंह कहलनि जे वायरल वीडियोमे देखायल व्यक्तिक पहिचान कएल जा रहल अछि आ आरोपितक विरुद्ध आवश्यक कानूनी कार्रवाई कएल जा रहल अछि। एहि मामिलामे केस दर्ज कए मुख्य आरोपी सहित चारि आरोपितकेँ गिरफ्तार कएल गेल अछि।
चिंताक बात जे एहि तरहक मामिला थम्हि नहिं रहल बिहारमे, जमुई, दरभंगा आ आब समस्तीपुरमे, तऽ की अपराधी बेखौफ भऽ गेल अछि ?
