राहुल गांधी इंदौरक छात्राक सवाल पर केंद्रसँ मांगलनि जवाब
नई दिल्ली । समदिया
लोकसभामे विपक्षी नेता राहुल गांधी ‘छात्रक गूंज’ कार्यक्रमक माध्यमसँ छात्र आ युवासभसँ संवाद कऽ रहल छथि। एहि क्रममे १९ सितंबरकेँ ओ मध्य प्रदेशक इंदौर पहुँचलाह, जतय छात्रसभसँ शिक्षा, छात्रावास, रोजगार आ प्रतियोगी परीक्षासँ जुड़ल समस्या पर बातचीत कएलनि।
राहुल गांधी रविदिन सोशल मीडिया मंच ‘एक्स’ पर इंदौरक एकटा छात्राक सवालक उल्लेख करैत केंद्र सरकारसँ जवाब मांगलनि। हुनकर पोस्टक अनुसार छात्राक सवाल छल—“सरकार लग दिया जराबय लेल पाइ अछि, मुदा हमर छात्रावास लेल किएक नहि ?”
राहुल गांधी कहलनि जे गामसँ शहर पढ़बाक लेल आएल एहि छात्राकेँ छात्रावास नहि भेटल, जाहिसँ पीजीमे रहबाक लेल मजबूर होबय पड़ैत अछि। सुरक्षित रहबाक लेल लाखों रुपया खर्च भऽ जाइत अछि आ प्रत्येक मास किरायाक चिंता बनल रहैत अछि। हुनकर अनुसार, आवास भत्ता महंगाइक अनुरूप नहि बढ़ैत अछि आ भ्रष्टाचार सेहो समस्या बनल अछि। एहि कारण किछु छात्रा पढ़ाइ छोड़बाक लेल विवश भऽ जाइत छथि।
राहुल गांधी प्रधानमंत्री नरेंद्र मोदीसँ सवालक जवाब मांगैत कहलनि जे “की ओहि बच्चीक सवालक कोनो जवाब अछि ?” हुनकर ‘छात्रक गूंज’ कार्यक्रमसँ पहिने कोटा, पुणे आ प्रयागराजमे सेहो छात्रसभसँ संवाद भऽ चुकल अछि।
राहुल गांधी कहलनि जे छात्रक सभसँ पैघ गुण सवाल पूछबाक होइत अछि। युवा देशक भविष्य छथि आ हुनका लेल शिक्षा, अवसर आ सुरक्षित वातावरण जरूरी अछि। हुनकर अनुसार छात्र जिज्ञासु होइत छथि, सवाल करैत छथि आ एक-दोसराक सम्मान आ मानवताक भाव राखैत छथि।
