एमएलसी चुनाव लेल जदयूक चारि प्रत्याशी तय

दरभंगा शिक्षक निर्वाचन क्षेत्रसँ दिलीप चौधरीक नाम चर्चामे

पटना । समदिया

बिहार विधान परिषदक शिक्षक आ स्नातक निर्वाचन क्षेत्रक चुनाव लेल जदयू अपन चारि प्रत्याशी तय कऽ लेने अछि। प्रत्याशीक आधिकारिक घोषणा एक-दू दिनक भीतर हेबाक संभावना अछि। परिषदक ई चुनाव नवंबरमे प्रस्तावित अछि।

पटना स्नातक निर्वाचन क्षेत्रसँ जदयू फेर नीरज कुमार पर भरोसा जताओत। नीरज कुमार एहि क्षेत्रसँ तीन बेर निर्वाचित भऽ चुकल छथि आ एहि बेर सेहो अपन जनसंपर्क अभियान तेज कऽ देने छथि।

तिरहुत स्नातक निर्वाचन क्षेत्रसँ अभिषेक झाक नाम तय मानल जा रहल अछि। एहि सीट पर पहिने देवेश चंद्र ठाकुर निर्वाचित भेल छलाह। हुनका सांसद बनलाक बाद दिसंबर 2024 मे भेल उपचुनावमे जदयू अभिषेक झाकेँ प्रत्याशी बनौने छल, मुदा ओ निर्दलीय प्रत्याशी वंशीधर ब्रजवासीसँ पराजित भऽ गेल छलाह।

सारण सीटसँ आनंद पुष्कर

सारण शिक्षक निर्वाचन क्षेत्रसँ जदयू आनंद पुष्करकेँ प्रत्याशी बना सकैत अछि। दिवंगत विधान पार्षद केदार पांडेयक पुत्र आनंद पुष्कर पिछला उपचुनावमे महागठबंधनक प्रत्याशी छलाह। चुनावक बाद ओ जदयूमे शामिल भऽ गेल छलाह।

दरभंगा शिक्षक सीट पर दिलीप चौधरी

जदयू लेल दरभंगा शिक्षक निर्वाचन क्षेत्र सेहो महत्वपूर्ण अछि। एहि सीटसँ पूर्व विधान पार्षद दिलीप चौधरीक नाम चर्चामे अछि। कहल जा रहल अछि जे दरभंगा स्नातक निर्वाचन क्षेत्रसँ चुनाव जीतैत रहल दिलीप चौधरी एहि बेर जदयू प्रत्याशी बनि दरभंगा शिक्षक निर्वाचन क्षेत्रसँ चुनाव लड़ि सकैत छथि।