रेलवे केर 7 हाई-डेंसिटी कॉरिडोरक मंजूरी, 5 राज्यक 56 लाख लोककेँ भेटत बेहतर रेल कनेक्टिविटी

नई दिल्ली । समदिया

प्रधानमंत्री नरेंद्र मोदीक अध्यक्षतामे बुधदिन, 9 सितंबर 2026 केँ भेल केंद्रीय मंत्रिमंडलक बैठकमे रेलवे आधुनिकीकरणसँ जुड़ल महत्वपूर्ण परियोजनाकेँ मंजूरी देल गेल। केंद्रीय रेल मंत्री अश्विनी वैष्णव कहलनि जे देशक 7 हाई-डेंसिटी रेलवे कॉरिडोरक चारि-लेन/चारि ट्रैक करबाक दिशामे परियोजनाकेँ स्वीकृति देल गेल अछि।

स्वीकृत प्रमुख परियोजनामे दिल्ली-मुंबई, मुंबई-चेन्नई, चेन्नई-कोलकाता, कोलकाता-दिल्ली, दिल्ली-चेन्नई, मुंबई-कोलकाता आ दिल्ली-गुवाहाटी मार्ग शामिल अछि। ई कॉरिडोर देशक रेल नेटवर्क लेल अत्यंत महत्वपूर्ण मानल जाइत अछि।

खड़गपुर-झारसुगुड़ा खंडमे चारिम रेल लाइन केर सेहो मंजूरी देल गेल अछि। 367 किलोमीटर नमहर एहि परियोजनापर करीब 6,528 करोड़ टाका खर्च होयत। तहिना अरक्कोणम-रेनिगुंटा खंडमे तेसर आ चारिम रेल लाइन बनाओल जाएत। 77 किलोमीटर नमहर एहि परियोजनापर 1,936 करोड़ टाका खर्च होयत।

11 हजार किमी हाई-डेंसिटी नेटवर्क

अश्विनी वैष्णव कहलनि जे करीब 11 हजार किलोमीटरक हाई-डेंसिटी कॉरिडोरमे रेलवे यातायातक लगभग 40 प्रतिशत संचालित होइत अछि। एहिमे करीब 2 हजार किलोमीटरक चारि-लाइनक काज पूरा भऽ चुकल अछि, जखनकि करीब 5 हजार किलोमीटर पर काज चलि रहल अछि अथवा स्वीकृति भेटि गेल अछि। शेष करीब 4 हजार किलोमीटर लेल DPR आ अंतिम स्वीकृतिक प्रक्रिया चलि रहल अछि।

5 राज्यक 14 जिलामे बढ़त रेल नेटवर्क

नव परियोजनासँ पश्चिम बंगाल, झारखंड, ओडिशा, मध्य प्रदेश आ छत्तीसगढ़क 14 जिलामे भारतीय रेलक नेटवर्क करीब 656 किलोमीटर बढ़त। एहिसँ करीब 4,790 गामक 56 लाख लोककेँ बेहतर रेल कनेक्टिविटी भेटत। सरकारक अनुसार, एकर माध्यमसँ स्थानीय स्तरपर रोजगार आ स्वरोजगारक अवसर सेहो बढ़त।

रेल परियोजनासँ तारातारिणी मंदिर, झारसुगुड़ाक जगन्नाथ मंदिर, बांधवगढ़ टाइगर रिजर्व, विराटेश्वर मंदिर, अमरकंटक, ज्वालेश्वर धाम, अचनकमार टाइगर रिजर्व, खुटाघाट बांध आ रतनपुर महामाया मंदिर जेहन धार्मिक आ पर्यटन स्थल धरि पहुँचना सेहो आसान होयत।

अश्विनी वैष्णव कहलनि जे ई परियोजना रेलवेकेँ आधुनिक, अधिक क्षमतावान आ भविष्यक बढ़ैत यातायातक लेल तैयार करबाक सरकारक दीर्घकालीन योजनाक महत्वपूर्ण हिस्सा अछि।