आरएसएस मुख्यालयक बाहर उदित राजक प्रदर्शन, मनुस्मृति जरेबाक बाद पुलिस बनौलक बंदी

नई दिल्ली । समदिया

कांग्रेस नेता आ केकेसीक राष्ट्रीय अध्यक्ष डॉ. उदित राजकेँ दिल्ली पुलिस बंदी बनौलक अछि। मंगलदिन ओ दिल्लीक केशव कुंज स्थित आरएसएस मुख्यालयक बाहर अचानक प्रदर्शन केलनि। एहि दौरान कांग्रेस आ दलित संगठनक कार्यकर्ता सभ जोरदार नारा लगौलनि। प्रदर्शनकारी सभ मनुस्मृतिक प्रति आ आरएसएसक प्रतीकात्मक पोशाक जरा देलनि।

उदित राज कहलनि जे देशक शासन भारतीय संविधानसँ चलत, मनुस्मृतिक नियमसँ नहि। हुनकर कहब छल जे ई प्रदर्शन उत्तराखंडक हल्द्वानीमे कांग्रेस अध्यक्ष मल्लिकार्जुन खरगेसँ जुड़ल कार्यक्रम स्थलकेँ शुद्धिकरण करबाक घटना आ राहुल गांधी पर दर्ज एफआईआरक विरोधमे कएल गेल अछि।

कांग्रेस आ किछु दलित संगठन हल्द्वानीक घटनाकेँ जातिवादी मानसिकतासँ जोड़ि रहल अछि। हुनकर आरोप अछि जे कांग्रेस अध्यक्ष मल्लिकार्जुन खरगेक रैलीक बाद आयोजन स्थल पर शुद्धिकरणक कार्यक्रम कएल गेल। एहि घटनाक विरोध करबाक क्रममे राहुल गांधी पर एफआईआर दर्ज होएबाक बात सेहो सामने आएल।

हिरासतमे लेल जाएसँ पहिने उदित राज मीडियासँ कहलनि, “हम केशव कुंज आएल छी आ मनुस्मृति जरौने छी।” ओ कहलनि जे हुनकर नेता मल्लिकार्जुन खरगेसँ अपमानजनक व्यवहार भेल अछि आ एकरा बर्दाश्त नहि कएल जायत। ओ एहि घटनाकेँ डॉ. भीमराव आंबेडकरक विरासतसँ जोड़ैत कहलनि जे आंबेडकर 25 दिसंबर 1927 केँ जातिगत असमानताक विरोधमे मनुस्मृति जरा देने छलाह।

उदित राज आरएसएस आ सत्तारूढ़ दल पर गंभीर आरोप लगबैत कहलनि जे आरएसएसक “ईकोसिस्टम” आइयो छुआछूतक मानसिकताकेँ मानैत अछि। हुनकर आरोप छल जे संविधानक जगह मनुस्मृतिक पुरान आ भेदभावपूर्ण नियम लागू करबाक प्रयास कएल जा रहल अछि। ओ कहलनि जे दलित समाज एहि तरहक अपमानकेँ कखनो स्वीकार नहि करत।

बताओल गेल अछि जे प्रदर्शनक पूर्व सूचना पुलिसकेँ नहि देल गेल छल। प्रदर्शनकारी सभ जखनि मनुस्मृतिक प्रति आ प्रतीकात्मक पोशाक जराबय लगलाह, तखन दिल्ली पुलिस तत्काल कार्रवाई करैत अतिरिक्त बल बजौलनि। स्थिति बिगड़यसँ पहिनहि पुलिस प्रदर्शनकारी सभकेँ ओतयसँ हटा देलक।

पुलिस उदित राज सहित दर्जनों कार्यकर्ताकेँ हिरासतमे लऽ कऽ पहाड़गंज थाना लऽ गेल। घटनाक बाद आरएसएस मुख्यालयक आसपास सुरक्षा सेहो बढ़ा देल गेल।