बिहार कैबिनेटमे 13 एजेंडा पर मुहर, विकासक हर क्षेत्र पर सरकारक  फोकस

सिंचाई, सड़क, कृषि, पशुपालन, भंडारण, AI आ उद्योगसँ संबंधित महत्वपूर्ण निर्णय

पटना । समदिया

मुख्यमंत्री सम्राट चौधरीक अध्यक्षतामे बिहार मंत्रिमंडलक महत्वपूर्ण बैठक मुख्य सचिवालयक कैबिनेट हॉलमे सम्पन्न भेल। एहि बैठकमे कुल 13टा एजेंडापर स्वीकृति प्रदान कएल गेल। मुख्यमंत्री सम्राट चौधरी स्वयं सोशल मीडिया मंच ‘एक्स’पर पोस्ट कऽ कैबिनेटक निर्णयसभक जानकारी देलनि। कैबिनेटक निर्णयमे सिंचाई, सड़क, कृषि, पशुपालन, भंडारण, कृत्रिम बुद्धिमत्ता (AI), उद्योग आ रोजगारक क्षेत्र पर विशेष ध्यान देल गेल अछि।

अररियामे नहर पुनर्स्थापनाक लेल 30.35 करोड़

कैबिनेट अररिया जिलाक नरपतगंज अंतर्गत जानकी नगर शाखा नहर आ एहिसँ निकलयवाला नहर प्रणालीसभक पुनर्स्थापनाक लेल 30 करोड़ 35 लाख रुपैयाक स्वीकृति देलक। एहि काजकेँ दू वर्षक भीतर पूरा करबाक लक्ष्य निर्धारित कएल गेल अछि।

एहिना कटिहार वितरणी, फूलपुर उप-वितरणी, हसनगंज उप-वितरणी, बैजनाथपुर उप-वितरणी आ सेमापुर उप-वितरणी सहित संबंधित नहर प्रणालीसभक पुनर्स्थापनाक लेल 35 करोड़ 81 लाख 52 हजार रुपैयाक स्वीकृति देल गेल अछि। एहि परियोजनाकेँ सेहो दू वर्षक भीतर पूरा करबाक लक्ष्य अछि।

11 हजार निजी नलकूपक लेल 305.60 करोड़

मुख्यमंत्री द्वारा निजी नलकूप योजनाक अंतर्गत वित्तीय वर्ष 2026-27मे 11 हजार निजी नलकूपक स्थापना लेल 305.60 करोड़ रुपैयाक स्वीकृति प्रदान कएल गेल अछि। सरकारक उद्देश्य “हर खेत धरि जल” पहुँचेनाइ अछि, जाहिसँ किसानसभकेँ सिंचाईक बेहतर सुविधा भेटि सकत।

एहि बीच बक्सर-भागलपुर सिक्स लेन ग्रीनफील्ड एक्सप्रेसवे, जे अरवल, नालंदा, जमुई, जहानाबाद सहित आन जिलासभकेँ जोड़त, ओकर लगभग 336 किलोमीटर लंबा निर्माणक दिशामे सेहो महत्वपूर्ण स्वीकृति देल गेल अछि।

पशुक नस्ल सुधार योजनाकेँ मंजूरी

डेयरी, मत्स्य एवं पशु संसाधन विभागक माध्यमसँ वित्तीय वर्ष 2026-27 मे 63.92 करोड़ रुपैयाक अनुमानित लागत पर COMFED, पटनाक माध्यमसँ राज्यक दूध उत्पादन आ पशु उत्पादकतामे वृद्धि लेल ‘नस्ल सुधार योजना’केँ स्वीकृति देल गेल अछि।

बिहारमे AI पारिस्थितिकी तंत्रक विकासपर जोर

राज्यमे कृत्रिम बुद्धिमत्ता अर्थात् AI पारिस्थितिकी तंत्रक विकास लेल टायो एआई इंडिया प्राइवेट लिमिटेड आ बिहारक सूचना प्रौद्योगिकी विभागक बीच समझौता ज्ञापन (MoU) पर हस्ताक्षरक स्वीकृति देल गेल अछि। सरकार एकरा तकनीक, नवाचार आ AIक माध्यमसँ बिहारकेँ भविष्य लेल तैयार करबाक महत्वपूर्ण पहल मानि रहल अछि।

गोदाम निर्माण लेल 34.95 करोड़

वित्तीय वर्ष 2026-27मे 48,200 मीट्रिक टन भंडारण क्षमता विकसित करबाक लक्ष्यसँ 200, 500 आ 1,000 मीट्रिक टन क्षमतावला गोदामसभक निर्माण योजनाकेँ मंजूरी देल गेल अछि। एहि लेल 52टा चयनित समितिकेँ 50 प्रतिशत अनुदान आ 50 प्रतिशत चक्रीय पूंजीक रूपमे कुल 34.95 करोड़ रुपैया देबाक स्वीकृति प्रदान कएल गेल अछि।

लखीसराय सोलर परियोजनाकेँ शुल्कमे पूर्ण छूट

लखीसरायक कजरा सोलर पावर परियोजना लेल अधिगृहीत भूमिक लीज दस्तावेजक निबंधनपर लगनिहार मुद्रांक शुल्क आ निबंधन शुल्कमे शत-प्रतिशत छूट देबाक स्वीकृति कैबिनेट देलक।

एहिसँ इतर, अवर प्रादेशिक नियोजनालयक नाम बदलि ‘जिला नियोजनालय’ करबाक निर्णय सेहो लेल गेल अछि।

सकरी आ रैयाम चीनी मिलक लेल सहकारी समितिक गठन

मधुबनी जिलाक सकरी आ दरभंगा जिलाक रैयाम चीनी मिल लेल अधिसूचित आरक्षित क्षेत्रक गन्ना उत्पादक आ गन्ना उत्पादन लेल प्रतिबद्ध किसानसभकेँ शामिल करबाक उद्देश्यसँ प्राथमिक चीनी मिल सहकारी समितिक गठन करबाक स्वीकृति देल गेल अछि।

सोशल आ ऑनलाइन मीडियाक नियमावलीमे संशोधन

राज्य सरकारक जनहितकारी योजना आ कार्यक्रमसभक व्यापक प्रचार-प्रसारकेँ बेसी प्रभावी आ व्यावहारिक बनेबाक उद्देश्यसँ बिहार सोशल मीडिया एवं ऑनलाइन मीडिया संशोधन नियमावली, 2026मे आवश्यक संशोधनक स्वीकृति सेहो कैबिनेट प्रदान कएलक।

कुल मिला कऽ मुख्यमंत्री सम्राट चौधरीक नेतृत्वमे भेल एहि कैबिनेट बैठकक निर्णयसभ बिहारक सड़क, सिंचाई, कृषि, पशुपालन, भंडारण, ऊर्जा, तकनीक आ प्रशासनिक व्यवस्थाकेँ मजबूत करबाक दिशामे महत्वपूर्ण मानल जा रहल अछि।