मिथिला क्षेत्रीय बिहारक दरभंगामे 25 वर्षीय सत्यमकेँ गोली मारि हत्या
दरभंगा । समदिया
मिथिला क्षेत्रीय बिहारक दरभंगा जिलाक कमतौल थाना क्षेत्रमे 25 वर्षीय युवक सत्यमकेँ गोली मारि हत्या कऽ देल गेल। हुनकर लहूलुहान शव रतनपुर-कलवाड़ा मुख्य सड़कक कातमे एकटा आमक गाछी लग झाड़ीसँ बरामद कएल गेल। पुलिसक अनुसार मृतकक शरीर पर गोली लागल तीनटा निशान भेटल अछि।
परिजनक अनुसार, सत्यम मंगलदिन साँझ अपन बेटी लेल दवा आनबाक बात कहि घरसँ निकलल छल। बताओल जा रहल अछि जे ओहि समय हुनका संग चारिटा युवक सेहो छल। राति लगभग 8 बजि 17 मिनट पर सत्यम अपन पिता संजीव कुमारसँ फोन पर गप केलनि आ अपनाकेँ मलिकपुरमे होएबाक जानकारी देलनि। एकर बाद हुनकर मोबाइल फोन बंद भऽ गेल।
किछु देर बाद रतनपुर-कलवाड़ा मुख्य सड़कक कातमे शव भेटबाक सूचना भेटिते परिवारमे कोहराम मचि गेल।
पिता चारु दोस्त पर जतौलनि संदेह
मृतकक पिता संजीव कुमार सत्यमक संग गेल चारिटा दोस्त पर संदेह व्यक्त केलनि अछि। ओ पुलिससँ एहि मामिलाक गहन जाँच कऽ दोषीकेँ पकड़ि कठोर कार्रवाई करबाक मांग कएलनि अछि। हालांकि, पुलिस एखनि धरि ककरो आरोपी घोषित नहि केलक अछि।
पुलिस अधिकारीक कहब अछि जे घटनाक सभटा संभावित पहलू केर ध्यानमे राखि जाँच कएल जा रहल अछि। शवकेँ पोस्टमार्टम लेल पठा देल गेल अछि। ओतहि एफएसएलक टीम घटनास्थल पर पहुँचि विभिन्न साक्ष्य जुटौलक अछि।
प्रारंभिक जाँचमे पुलिसकेँ आशंका अछि जे सत्यमक हत्या कोनो दोसर स्थान पर कएल गेल होएत आ बादमे शवकेँ रतनपुर-कलवाड़ा मुख्य सड़कक कातमे आनिकऽ फेकि देल गेल।
फिलहाल पुलिस हत्याक कारण आ एहि वारदातमे शामिल लोकसभक पहिचान करबाक प्रयासमे जुटल अछि। घटनास्थलसँ भेटल साक्ष्य आ मृतकक मोबाइल फोनसँ जुड़ल जानकारीक आधार पर सेहो जाँच आगाँ बढ़ाओल जा रहल अछि।
