राष्ट्रीय खेल पुरस्कार 2025 घोषित, 17 खिलाड़ीकेँ अर्जुन पुरस्कार, 3 प्रशिक्षककेँ द्रोणाचार्य सम्मान
नई दिल्ली । समदिया
युवा कार्य आ खेल मंत्रालय द्वारा मंगलदिन राष्ट्रीय खेल पुरस्कार 2025क घोषणा कयल गेल। एहि वर्ष विभिन्न खेल क्षेत्रक 17 खिलाड़ीकेँ अर्जुन पुरस्कार लेल चयनित कयल गेल अछि। ओतहि 3 प्रशिक्षककेँ द्रोणाचार्य पुरस्कार देल जाएत।
भारतक उच्चतम न्यायालयक पूर्व न्यायमूर्ति (सेवानिवृत्त) अरुण कुमार मिश्राक अध्यक्षतामे गठित चयन समितिक सिफारिशक आधार पर सरकार द्वारा विभिन्न श्रेणीमे खिलाड़ी, प्रशिक्षक आ संस्थाक सम्मान लेल चयन कयल गेल अछि।
17 खिलाड़ीकेँ अर्जुन पुरस्कार
अर्जुन पुरस्कार 2025 लेल चयनित खिलाड़ी सभमे तेजस्विन शंकर, मुहम्मद अजमल वी आ प्रियंका गोस्वामी (एथलेटिक्स), ट्रीसा जॉली आ पुलेला गायत्री गोपीचंद (बैडमिंटन), नरेंद्र (बॉक्सिंग), विदित संतोष गुजराती आ दिव्या जितेंद्र देशमुख (शतरंज), धनुष श्रीकांत (डेफ शूटिंग), लालरेमसियामी आ राजकुमार पाल (हॉकी), सुरजीत आ पूजा (कबड्डी), रुद्रांश खंडेलवाल (पैरा-शूटिंग), एकता भ्यान (पैरा एथलेटिक्स), अरविंद सिंह (रोइंग) आ अखिल श्योराण (शूटिंग) शामिल छथि।
अर्जुन पुरस्कार ओहि खिलाड़ी सभकेँ देल जाइत अछि जे पछिला चारि वर्षमे उत्कृष्ट प्रदर्शनक संग नेतृत्व क्षमता, खेल-भावना आ अनुशासनक भावना प्रदर्शित कयने छथि।
आई अरुमनायगमकेँ अर्जुन पुरस्कार (लाइफटाइम)
आई अरुमनायगम (फुटबॉल) केँ अर्जुन पुरस्कार (लाइफटाइम) 2025 लेल चयनित कयल गेल अछि। ई सम्मान एहेन खिलाड़ी सभकेँ देल जाइत अछि जे खेलसँ संन्यासक बाद सेहो खेलक विकास आ प्रोत्साहनमे योगदान दैत रहल छथि।
तीन प्रशिक्षककेँ द्रोणाचार्य पुरस्कार
द्रोणाचार्य पुरस्कार 2025 लेल परवीर सिंह (एथलेटिक्स), छोटे लाल यादव (बॉक्सिंग) आ नेहा नंदकुमार चव्हाण (शूटिंग) केँ चयनित कयल गेल अछि।
ई पुरस्कार एहेन प्रशिक्षक सभकेँ देल जाइत अछि जे लगातार उत्कृष्ट आ प्रभावकारी प्रशिक्षण दैत छथि आ खिलाड़ी सभकेँ राष्ट्रीय तथा अंतरराष्ट्रीय प्रतियोगितामे बेहतर प्रदर्शन करबाक लेल तैयार करैत छथि।
द्रोणाचार्य पुरस्कार (लाइफटाइम) 2025 लेल धर्मेंद्र सिंह यादव (बॉक्सिंग) आ वीरेंद्र कुमार (कुश्ती) केँ चयनित कयल गेल अछि।
आर्मी पैरालंपिक नोड, पुणेकेँ खेल प्रोत्साहन पुरस्कार
राष्ट्रीय खेल प्रोत्साहन पुरस्कार 2025 लेल आर्मी पैरालंपिक नोड, पुणेकेँ चयनित कयल गेल अछि। ई सम्मान ओहि संस्था, कॉरपोरेट इकाई आ गैर-सरकारी संगठनकेँ देल जाइत अछि जे खेलक प्रोत्साहन आ विकासमे महत्वपूर्ण योगदान दैत अछि।
राष्ट्रीय खेल पुरस्कार प्रत्येक वर्ष खेलक क्षेत्रमे उत्कृष्ट योगदान देनिहार खिलाड़ी आ प्रशिक्षक सभकेँ सम्मानित करबाक लेल प्रदान कयल जाइत अछि।
