झारखंडमे छात्र आंदोलन तेज, २२ दिनसँ धरनामे बैसल अभ्यर्थी मांगलनि सीएम हेमंत सोरेनक इस्तीफा

जेपीएससी-जेएसएससी परीक्षा रद्द आ सीबीआई जाँचक मांग, सोमदिन राज्यभरि पुतला दहन, सीएम आवास घेरावक चेतावनी

राँची । समदिया

झारखंडमे जेपीएससी (JPSC) आ जेएसएससी (JSSC) भर्ती परीक्षामे कथित अनियमितता आ धांधलीक आरोपक लऽ कऽ छात्र आंदोलन दिन-प्रतिदिन तेज होइत जा रहल अछि। राजधानी राँचीक जयपाल सिंह मुंडा स्टेडियममे विगत २२ दिनसँ धरना पर बैसल प्रतियोगी अभ्यर्थी आब मुख्यमंत्री हेमंत सोरेनक इस्तीफाक मांग कऽ देलनि अछि।

आंदोलनकारी छात्र सरकार द्वारा चलाओल जा रहल ‘छात्रक वार्ता, छात्रक संग’ अभियान पर सेहो सवाल उठौलनि। छात्र प्रतिनिधि पीयूष कुमार कहलनि जे जखनि अभ्यर्थी २२ दिनसँ खुला आकाशक नीचाँ धरना पर बैसल छथि, तखनि सरकार हुनका सभसँ संवाद करबाक बदला अलगसँ संवाद अभियान चला रहल अछि। हुनकर कहब छल जे, “हम २२ दिनसँ बैसल छी, कीड़ा-मकोड़ा छी ?”

सरकार पर उपेक्षाक आरोप

आंदोलनकारी छात्रक आरोप अछि जे सरकार वास्तविक रूपसँ प्रभावित अभ्यर्थीसँ सीधा संवाद करबाक बदला केवल अभियान चलाकऽ अपन जिम्मेदारी पूरा कएल जकाँ देखाबऽ चाहैत अछि। छात्र सभक कहब अछि जे हुनकर मांग पर सरकारकेँ स्पष्ट आ ठोस निर्णय लेबाक चाही।

छात्रक प्रमुख मांग

आंदोलनकारी अभ्यर्थी अपन मांग पर अडिग छथि। हुनकर प्रमुख मांग सभमे –

– जेपीएससीक ११मसँ १३म चरण धरि विवादित परीक्षाकेँ रद्द कएल जाए।

– जेएसएससीक विवादित भर्ती परीक्षाक सेहो निष्पक्ष समीक्षा कऽ रद्द कएल जाए।

– परीक्षामे कथित धांधली आ भ्रष्टाचारक निष्पक्ष सीबीआई जाँच कराओल जाए।

– जँ सरकार निष्पक्ष जाँच आ अभ्यर्थीकेँ न्याय नहि दऽ सकैत अछि, तँ मुख्यमंत्री हेमंत सोरेन अपन पदसँ इस्तीफा दिअ।

आइ सोमकेँ राज्यभरिमे पुतला दहन

छात्र सभ आंदोलनकेँ आब राज्यक अन्य जिलामे सेहो विस्तार देबाक घोषणा कएलनि अछि। आंदोलनकारीक अनुसार सोमदिन झारखंडक सभ जिला मुख्यालय पर सरकारक पुतला दहन कएल जाएत।

छात्र सभ चेतावनी देलनि अछि जे पुतला दहनक बादो जँ सरकार हुनकर मांग पर ठोस निर्णय नहि लैत अछि, तँ राज्यभरिक अभ्यर्थी राँची कूच करताह आ मुख्यमंत्री आवासक अनिश्चितकालीन घेराव करताह।

अभ्यर्थी सभक स्पष्ट कहब अछि जे जखनि धरि हुनकर सभ मांग पूरा नहि होइत अछि, तखनि धरि आंदोलन जारी रहत। आंदोलनक आगाँक रणनीति सरकारक रुख पर निर्भर करत।