मिथिलाक लोक कलाकार महेंद्र राम राष्ट्रपति पुरस्कारसँ सम्मानित
राजनगर/मधुबनी समदिया!! लोक संगीत विधामे मिथिलाक अमूर्त संस्कृतिक संवाहक ‘रसनचौकी वादक’ आ गुरु राजनगर प्रखण्डक भटसिमर निवासी महेन्द्र रामकेँ संगीत नाटक अकादमी पुरस्कारसँ सम्मानित कयल गेल। मिथिलाक पारम्परिक ‘रसनचौकी’ लोकसंगीतक संरक्षण आ वादनमे लगभग 55 वर्षक योगदान लेल हुनका सम्मानित कएल गेल। हुनका राष्ट्रपति द्रौपदी मुर्मूक हाथे ताम्रपत्र, प्रशस्तिपत्र आ एक लाख रुपैयाक राशि भेटलनि। समारोह दिल्लीक विज्ञान भवनमे भेल।
समृद्ध लोक सांस्कृतिक परम्पराक क्षेत्रमे ई प्रतिष्ठित सम्मान प्राप्त करब नहि केवल महेंद्र रामक दशकोंक साधना समर्पण एवं प्रतिभाक सम्मान अछि, बल्कि मिथिलाक गौरवशाली लोक कला, संस्कृति आ परम्परा सहित राष्ट्रीय पहिचानक सेहो गौरवपूर्ण क्षण अछि।
भटसिमर निवासी महेंद्र रामकेँ देशक प्रतिष्ठित सम्मान भेटलासँ हुनक गाम भटसिमरमे राष्ट्रीय पावनि स्वतंत्रता दिवसक उत्साहमे चारि चांद लागि गेल अछि।
भटसिमर पश्चिमी पंचायतक मुखिया गूंज देवी आ मुखिया प्रतिनिधि दीपेन्द्र कुमार मण्डल सहित अन्य ग्रामीण लोकनि खुशीसँ भावविभोर भऽ कहलनि जे ई गाम आई धन्य भऽ गेल। माननीय राष्ट्रपतिक हाथे एहि गामक बुजुर्ग कलाकार महेन्द्र रामकेँ सम्मानित होयब नहि केवल भटसिमर बल्कि सम्पूर्ण मिथिलाक कलाप्रेमीक सम्मान भेल, लोकसभ खुशीक इजहार कयलनि।
