देशमे जुलाईमे खुदरा महंगाई दर 4.45 प्रतिशत, आलू-टमाटर- भिंडी-मटरक दाम घटल
नई दिल्ली । समदिया
भारतमे जुलाई 2026 मे खुदरा महंगाई दर सालाना आधार पर मामूली बढ़ि 4.45 प्रतिशत रहल। जूनमे ई दर 4.38 प्रतिशत छल। सांख्यिकी आ कार्यक्रम क्रियान्वयन मंत्रालय द्वारा बुधकेँ जारी आंकड़ाक अनुसार, जुलाईमे ग्रामीण क्षेत्रमे खुदरा महंगाई दर 4.84 प्रतिशत, जखनिकि शहरी क्षेत्रमे 3.96 प्रतिशत रहल।
जुलाईमे खाद्य महंगाई दर 5.52 प्रतिशत दर्ज भेल। ग्रामीण क्षेत्रमे खाद्य महंगाई 5.79 प्रतिशत आ शहरी क्षेत्रमे 5.05 प्रतिशत रहल।
आंकड़ाक अनुसार, जुलाईमे आलूक दाम सालाना आधार पर 16.56 प्रतिशत घटल। भिंडीक दाममे 5.52 प्रतिशत, मटरमे 5.27 प्रतिशत आ टमाटरमे 4.59 प्रतिशतक कमी दर्ज भेल। जीप आ मोटर कारक दाममे सेहो 6.72 प्रतिशतक गिरावट रहल।
दोसर दिसि, चांदीक आभूषणक कीमतमे सालाना आधार पर 109.84 प्रतिशतक तेज बढ़ोतरी दर्ज भेल। आदमे 83.62 प्रतिशत, लहसुनमे 35.36 प्रतिशत, सोना-हीरा-प्लैटिनम आभूषणमे 32.98 प्रतिशत आ प्याजमे 22.54 प्रतिशत महंगाई रहल।
विभिन्न क्षेत्रक बात करी तऽ जुलाईमे फूड एंड बेवरेज श्रेणीमे महंगाई दर 5.24 प्रतिशत रहल। पान, तंबाकू आ नशीला पदार्थमे 4.79 प्रतिशत, कपड़ा आ जूतामे 3.38 प्रतिशत, स्वास्थ्य सेवामे 1.34 प्रतिशत, परिवहनमे 4.43 प्रतिशत आ शैक्षणिक सेवामे 3.64 प्रतिशत महंगाई दर्ज भेल।
राज्यक स्तर पर जुलाईमे तेलंगाना 6.32 प्रतिशतक संग सभसँ बेसी खुदरा महंगाई वाला राज्य रहल। एकर बाद आंध्र प्रदेश 5.72 प्रतिशत, तमिलनाडु 5.44 प्रतिशत, मध्य प्रदेश 4.91 प्रतिशत आ कर्नाटक 4.89 प्रतिशत रहल।
एहि बीच भारतीय रिजर्व बैंक वित्त वर्ष 2026-27 लेल खुदरा महंगाई दर 5 प्रतिशत रहबाक अनुमान देने अछि। आरबीआईक अनुसार, वैश्विक अस्थिरताक कारण अल्पावधिमे महंगाई दरमे फेर बढ़ोतरी भऽ सकैत अछि।
आरबीआई एमपीसीक फैसला घोषित करैत गवर्नर संजय मल्होत्रा कहलनि जे लगातार 16 महीना केंद्रीय बैंकक 4 प्रतिशतक लक्ष्यसँ नीचा रहलाक बाद जूनमे खुदरा महंगाई बढ़ि कऽ करीब 4.4 प्रतिशत भऽ गेल। हुनका अनुसार, पहिल तिमाहीमे महंगाई दर आरबीआईक पहिल अनुमानसँ 30 आधार अंक कम रहल, जाहिसँ संकेत भेटैत अछि जे इनपुट लागतमे बढ़ल दबावक असरि सीमित रहल।
