राज्यमे वंशावली बनबेंआइ भेल सुलभ, नोटरीक शपथपत्र केर भेटल मान्यता
जन्म, मृत्यु आ वंशावली प्रमाणपत्र बनबाबयमे आब नहि काटऽ पड़त अनावश्यक चक्कर; सरकार सभ जिलाधिकारीकेँ देलक आवश्यक कार्रवाईक निर्देश
पटना । समदिया
बिहार सरकार जन्म, मृत्यु आ वंशावली प्रमाणपत्र बनाबऽवला लोककेँ पैघ राहत देलक अछि। आब एहि प्रमाणपत्र सभसँ जुड़ल मामिलामे नोटरी पब्लिक द्वारा विधिवत निष्पादित शपथपत्रकेँ सेहो मान्यता देल जाएत। एहि संबंधमे सभ जिलामे आवश्यक कार्रवाई करबाक निर्देश देल गेल अछि।
योजना एवं विकास विभाग, पटनाक सचिवक दिसिसँ सभ जिलाधिकारीकेँ पत्र पठा कऽ निर्देश देल गेल अछि जे अंचल कार्यालयमे जन्म, मृत्यु आ वंशावली प्रमाणपत्रसँ संबंधित मामिलामे नोटरी पब्लिक द्वारा विधिवत निष्पादित शपथपत्रकेँ नियमानुसार स्वीकार कएल जाए।
शपथपत्र स्वीकार करबामे नहि होए अनावश्यक आपत्ति
सरकारक निर्देशमे मुख्य सचिवक पूर्व आदेशक उल्लेख करैत कहल गेल अछि जे नोटरी द्वारा विधिवत पंजीकृत आ निष्पादित शपथपत्र कानून सम्मत होइत अछि। सक्षम प्रमाणक अथवा नोटरी पब्लिकक समक्ष देल गेल शपथपत्रकेँ स्वीकार करबामे सिविल प्राधिकारी द्वारा अनावश्यक आपत्ति नहि कएल जाए।
सरकार स्पष्ट कएने अछि जे जँ कोनो स्तरपर नोटरीक शपथपत्र स्वीकार करबामे अनावश्यक परेशानी अथवा आपत्ति उत्पन्न कएल जा रहल अछि तँ ओकरा तत्काल दूर कएल जाए। प्रमाणपत्र जारी करबाक प्रक्रियामे अनावश्यक विलंब नहि करबाक निर्देश सेहो देल गेल अछि।
आरा निवासी अधिवक्ताक आवेदनक बाद भेल कार्रवाई
जानकारीक अनुसार आरा जिलाक अधिवक्ता प्रमोद कुमार राय एहि संबंधमे राष्ट्रपति सचिवालय, नई दिल्लीकेँ आवेदन पठेने छलाह। आवेदनक आलोकमे राज्य सरकारक स्तरपर मामिलाक समीक्षा कएल गेल। समीक्षाक उपरांत संबंधित विभाग आ अधिकारी सभकेँ आवश्यक कार्रवाई करबाक निर्देश जारी कएल गेल।
जमीन सर्वे आ पैतृक संपत्तिमे भेटत विशेष लाभ
बिहारमे चलि रहल जमीन सर्वे, पैतृक संपत्तिक बंटवारा आ अन्य भूमि संबंधी कार्यमे वंशावलीक महत्वपूर्ण भूमिका अछि। ग्रामीण क्षेत्रमे वंशावली अथवा वंश-वृक्ष तैयार करबामे लोककेँ पंचायत आ अंचल कार्यालयक विभिन्न प्रक्रियासँ गुजरऽ पड़ैत छल।
कतेको मामिलामे पंचायत सचिव, वार्ड सदस्य, मुखिया अथवा सरपंचक संस्तुति आ प्रमाणनक आवश्यकता पड़ैत छल। एहि कारणे लोककेँ पंचायत कार्यालयसँ लऽ कऽ अंचल कार्यालय धरि कतेको बेर चक्कर लगाबऽ पड़ैत छल।
सरकारक नव निर्देशसँ नोटरी पब्लिकक समक्ष विधिवत तैयार आ निष्पादित शपथपत्रकेँ सेहो मान्यता देबाक बाट साफ भेल अछि। एहिसँ वंशावली आ अन्य संबंधित प्रमाणपत्र बनाबऽवला लोककेँ एकटा वैकल्पिक आ अपेक्षाकृत सरल प्रक्रिया उपलब्ध भऽ सकैत अछि।
लोककेँ की भेटत फायदा ?
नोटरीक विधिवत निष्पादित शपथपत्रकेँ मान्यता भेटलासँ दस्तावेज तैयार करबाक प्रक्रिया सरल होएबाक आ अनावश्यक देरी घटबाक उम्मीद अछि। खास कऽ जमीन सर्वे आ पैतृक संपत्तिसँ संबंधित मामिलामे वंशावली प्रमाणपत्रक आवश्यकता पड़ऽवला लोककेँ एकर लाभ भेटत।
हालाँकि, नोटरीक शपथपत्र अपन-आपमे अन्य आवश्यक दस्तावेज अथवा निर्धारित कानूनी प्रक्रियाक विकल्प नहि होएत। संबंधित प्रमाणपत्र जारी कराबऽ लेल विभागीय नियम आ आवश्यक कागजातक पालन करब अनिवार्य रहत।
राज्य सरकार सभ संबंधित अधिकारीकेँ निर्देश देलक अछि जे नोटरी पब्लिक द्वारा विधिवत निष्पादित शपथपत्रकेँ नियमानुसार स्वीकार कएल जाए आ मात्र शपथपत्रक मान्यताकेँ लऽ कऽ आम लोककेँ अनावश्यक परेशानी नहि होए।
