अरुणाचल भारतक अभिन्न अंग, एहि सत्यकेँ केओ नहि बदलि सकैछ : विदेश मंत्रालय
चीनक दावापर भारतक दू टूक, सीमाक्षेत्रमे शांति आ स्थिरता सर्वोच्च प्राथमिकता
नई दिल्ली । समदिया
विदेश मंत्रालय चीनक अरुणाचल प्रदेश संबंधी दावापर भारतक रुख एक बेर फेर स्पष्ट कएलक अछि। विदेश मंत्रालयक प्रवक्ता रणधीर जायसवाल कहलनि जे अरुणाचल प्रदेश भारतक अभिन्न आ अविभाज्य अंग अछि आ एहि निर्विवाद सत्यकेँ कियो नहि बदलि सकैत अछि।
दिल्लीमे आयोजित मीडिया ब्रीफिंगमे जायसवाल भारत-चीन सीमा विवाद, बांग्लादेश, पाकिस्तान अधिकृत जम्मू-कश्मीर (PoJK), पड़ोसी देश सभसँ संबंध आ स्लोवेनियामे भारतीय दूतावासमे तोड़फोड़ सहित विभिन्न मुद्दापर भारतक स्थिति स्पष्ट कएलनि।
सीमाक्षेत्रमे शांति सर्वोच्च प्राथमिकता
भारत-चीन संबंधक संदर्भमे विदेश मंत्रालय कहलनि जे सीमाक्षेत्रमे शांति आ स्थिरता बनाएब भारत लेल अत्यंत महत्वपूर्ण अछि। भारत बातचीतक दौरान लगातार एहि बातपर जोर दैत रहल अछि जे सीमाक्षेत्रक स्थिति दुनू देशक व्यापक द्विपक्षीय संबंधपर सेहो प्रभाव डालैत अछि।
जायसवालक अनुसार, भारत-चीन सीमा मामिलासँ संबंधित WMCC केर 36म बैठकमे सेहो भारत एहि रुखकेँ दोहरौने छल।
बांग्लादेशी प्रधानमंत्रीकेँ भारतक न्योता
विदेश मंत्रालयक प्रवक्ता बतौलनि जे भारतीय दूत दिनेश त्रिवेदी बांग्लादेशी प्रधानमंत्री रहमानसँ भेंट कएने छथि। भारतक दिसिसँ बांग्लादेशी प्रधानमंत्रीकेँ द्विपक्षीय यात्राक लेल आमंत्रित कएल गेल अछि। एकर अतिरिक्त दिल्लीमे आयोजित होमयवला BRICS Outreach Session मे शामिल होबय लेल सेहो हुनका न्योता देल गेल अछि।
विदेश मंत्रालय कहलनि जे एहि संबंधमे आगू जे कोनो जानकारी होएत, समय-समयपर साझा कएल जाएत।
PoJK पर सेहो भारतक नजरि
पाकिस्तान अधिकृत जम्मू-कश्मीरक घटनाक्रमपर भारत लगातार नजरि राखय केर बात दोहरौलक अछि। जायसवाल कहलनि जे पाकिस्तानमे मानवाधिकार उल्लंघनक मामिलापर भारत गंभीर चिंता व्यक्त करैत रहल अछि।
ओ कहलनि जे अंतरराष्ट्रीय समुदायकेँ पाकिस्तानमे मानवाधिकार उल्लंघनक मामिलामे जवाबदेही सुनिश्चित करबाक लेल आवश्यक कदम उठेबाक चाही।
नेबरहुड फर्स्ट’ नीति पर जोर
विदेश मंत्रालय कहलनि जे भारत अपन ‘नेबरहुड फर्स्ट’ नीतिक तहत पड़ोसी देश सभक संग संबंधकेँ मजबूत करबाक लेल लगातार प्रयासरत अछि। एहि क्रममे विदेश सचिवक भूटान आ श्रीलंका यात्रा सेहो भेल अछि।
भारतक पड़ोसी देश सभक संग विकास साझेदारी, आर्थिक सहयोग आ अन्य क्षेत्रमे संबंधकेँ गहींर करबाक प्राथमिकता अछि। मंत्रालयक अनुसार, भारत BRICS देश सभ आ साझेदार देश सभकेँ BRICS शिखर सम्मेलनमे शामिल होबय लेल आमंत्रित कएने अछि। क्षेत्रीय समूहक विभिन्न नेता सभकेँ Outreach Session लेल सेहो न्योता देल गेल अछि।
ल्युब्लियानामे भारतीय दूतावासमे तोड़फोड़ पर कड़ा आपत्ति
स्लोवेनियाक राजधानी ल्युब्लियानामे भारतीय दूतावासमे तोड़फोड़क घटनापर भारत कड़ा आपत्ति दर्ज करौलक। विदेश मंत्रालय कहलनि जे घटनाक भारत निंदा कएने अछि आ स्लोवेनिया सरकारक समक्ष एहि मामिला केर उठाओल गेल अछि।
भारत स्पष्ट कएने अछि जे वियना कन्वेंशनक तहत राजनयिक परिसर आ राजनयिक गतिविधिक पूर्ण सुरक्षा सुनिश्चित होयबाक चाही। भारत दिल्ली स्थित स्लोवेनियाई दूतावास आ स्लोवेनियाक विदेश मंत्रालयक समक्ष सेहो मामिला उठबैत दोषी सभ पर तत्काल कार्रवाई आ कानूनक अनुरूप उचित दंडक मांग कएने अछि।
