‘दिल्ली आ राँचीक छात्रमे फर्क किएक ?’ छात्र आंदोलन पर राहुल गांधीसँ नीतीश मिश्रक सवाल

पटना । समदिया

बिहार सरकारक मंत्री आ भाजपा नेता नीतीश मिश्र विपक्ष पर संसदक कार्यवाही बाधित करबाक आरोप लगबैत छात्र आंदोलनक मुद्दा पर कांग्रेस नेता राहुल गांधीसँ सवाल कएलनि। ओ कहलनि जे दिल्लीमे छात्र आंदोलनक समय विपक्ष खुलिकऽ छात्रक समर्थनमे ठाढ़ देखायल छल, मुदा झारखंडमे जेपीएससी आ जेएसएससी परीक्षासँ जुड़ल मांगकेँ लऽ कऽ आंदोलनरत छात्रक सुधि लेबय लेल विपक्ष तैयार नहि देखाइत अछि।

‘की झारखंडक छात्र देशक छात्र नहि छथि ?’

नीतीश मिश्र कहलनि जे छात्र आ युवा सभक मुद्दा महत्वपूर्ण अछि। लोकतंत्रमे छात्रकेँ अपन बात शांतिपूर्ण आ उचित माध्यमसँ रखबाक पूरा अधिकार अछि। मुदा दिल्ली आ झारखंडक छात्र आंदोलनकेँ लऽ कऽ विपक्षक रवैयामे अंतर किएक अछि, ई सवाल उठैत अछि।

हुनक सवाल छल—“की झारखंडमे आंदोलन करयवला छात्र देशक छात्र नहि छथि ?” हुनका अनुसार देशक युवा सभक मनमे सेहो ई प्रश्न उठि रहल अछि जे राजनीतिक सुविधा अनुसार विपक्ष अलग-अलग राज्यमे छात्र आंदोलन पर अलग-अलग रुख किएक अपनबैत अछि।

झारखंड सरकार पर सेहो साधलनि निशाना

भाजपा नेताक आरोप अछि जे झारखंड सरकार जेपीएससी आ जेएसएससी परीक्षासँ जुड़ल विषयमे बेर-बेर अपन रुख बदलैत रहल अछि। ओ कहलनि जे छात्रक समस्या पर स्पष्ट आ स्थायी नीति बनबाक चाही, जाहिसँ युवामे भरोसा कायम रहय।

संसदक कार्यवाही बाधित करबाक आरोप

नीतीश मिश्र संसदमे विपक्षक रवैयापर सेहो सवाल उठौलनि। ओ कहलनि जे करीब 15 दिनसँ संसदक कार्यवाहीकेँ लगातार बाधित करबाक प्रयास भऽ रहल अछि। संसदीय कार्य मंत्री किरेन रिजिजू स्पष्ट कऽ चुकल छथि जे सरकार सभ विषय पर चर्चा करबाक आ जवाब देबाक लेल तैयार अछि।

हुनका अनुसार संसद नियम आ संसदीय परंपराक अनुसार चलैत अछि। विपक्षकेँ अपन मुद्दा सदनमे राखबाक चाही आ सरकारक जवाब सेहो धैर्यपूर्वक सुनबाक चाही। बेर-बेर मुद्दा बदलनाय आ सदनक कार्यवाही बाधित करनाय गंभीर बहससँ बचबाक संकेत अछि।

‘लोकतंत्रक खूबसूरती संवाद आ विमर्शमे’

नीतीश मिश्र कहलनि जे लोकतंत्रक वास्तविक खूबसूरती संवाद आ विमर्शमे अछि। बिहारमे कर्मचारी संगठनक हड़तालक समय सेहो बातचीतक माध्यमसँ समाधान निकालल गेल।

ओ कहलनि जे छात्र आंदोलनक अधिकार पर हुनकर प्रश्न नहि अछि, बल्कि सवाल विपक्षक अलग-अलग स्थान पर अलग-अलग राजनीतिक रवैयापर अछि। युवा सभ देखि रहल छथि जे राजनीतिक सुविधा अनुसार विपक्ष अलग-अलग मुद्दापर अपन रुख बदलैत अछि।