‘भारत 2047 धरि बनत विश्वक सभसँ शक्तिशाली देश’, तिरंगा यात्रा अभियानकेँ बनाउ सफल : सीएम सम्राट

पटना । समदिया

स्वतंत्रता दिवसक अवसर पर देशभक्ति आ राष्ट्रप्रेमक भावना मजबूत करबाक उद्देश्यसँ सोमकेँ पटनामे भव्य तिरंगा यात्रा निकालल गेल। जेपी गोलंबरसँ कारगिल चौक धरि आयोजित एहि यात्रामे मुख्यमंत्री सम्राट चौधरी स्वयं हाथमे तिरंगा लेने सहभागी भेलाह। मुख्यमंत्री करीब डेढ़ किलोमीटर पैदल चललाह। जेपी गोलंबर पहुँचि ओ लोकनायक जयप्रकाश नारायणक प्रतिमापर माल्यार्पण सेहो कयलनि।

यात्रामे हजारों लोक हाथमे तिरंगा लेने सहभागी भेलाह आ ‘भारत माता की जय’क जयघोषसँ पूरा क्षेत्र गुँजैत रहल। एहि अवसर पर मंत्री रामकृपाल यादव, विजय सिन्हा, भाजपा प्रदेश अध्यक्ष संजय सरावगी सहित अनेक नेता आ कार्यकर्ता उपस्थित छलाह।

तिरंगा एकता, अखंडता आ संप्रभुताक प्रतीक : मुख्यमंत्री

मुख्यमंत्री सम्राट चौधरी कहलनि जे तिरंगा देशक एकता, अखंडता आ संप्रभुताक प्रतीक अछि। तिरंगा देशवासी लेल केवल ध्वज नहि, बल्कि देशक सम्मान आ बलिदानक प्रतीक अछि। तिरंगाक आन-बान-शान लेल लाखों सैनिक अपन प्राणक आहुति देने छथि।

ओ कहलनि जे भारत सदिखन शांतिक पक्षधर रहल अछि, मुदा जँ कोनो देश भारतसँ लड़बाक प्रयास करैत अछि तँ ओकरा उचित आ कड़ा जवाब देबाक क्षमता सेहो देश लग अछि।

2047 मे भारत बनत सभसँ शक्तिशाली देश

मुख्यमंत्री कहलनि जे भारत निरंतर विकासक पथपर आगाँ बढ़ि रहल अछि आ 2047 मे भारत विश्वक सभसँ शक्तिशाली देशक रूपमे उभरि कऽ सामने आएत। एहि लेल प्रत्येक नागरिककेँ देशक विकास आ एकतामे अपन योगदान देबाक आवश्यकता अछि।

ओ कहलनि जे आजुक तिरंगा यात्रा केवल तीन रंगक ध्वजक यात्रा नहि अछि। एहि तिरंगामे हमर पूर्वज आ स्वतंत्रता सेनानीक संघर्ष, त्याग आ बलिदानक इतिहास समाहित अछि। स्वतंत्रता सेनानी अपन प्राणक आहुति दऽ लोकतंत्रक स्थापना कएलनि आ देशमे तिरंगाकेँ सम्मानित स्थान देलनि।

10 सँ 17 अगस्त धरि तिरंगा यात्रामे भाग लेबाक अपील

मुख्यमंत्री सम्राट चौधरी लोकसँ 10 सँ 17 अगस्त धरि चलयवला तिरंगा यात्रामे अधिकसँ अधिक संख्यामे सहभागी होबाक अपील केलनि। ओ कहलनि जे प्रखंड स्तरपर सेहो एहि कार्यक्रमक आयोजन भऽ रहल अछि। लोक सभ एहि अभियानमे सहभागी भऽ तिरंगाक सम्मानमे अपन उपस्थिति दर्ज कराउ आ अभियानकेँ सफल बनाउ।

‘हर घर तिरंगा’ अभियानकेँ जन-जन धरि पहुँचयबाक उद्देश्य

जानकारीक अनुसार स्वतंत्रता दिवसक अवसरपर ‘हर घर तिरंगा अभियान’क माध्यमसँ लोकमे देशभक्तिक भावना बढ़ेबाक प्रयास कएल जा रहल अछि। तिरंगा यात्राक उद्देश्य एहि अभियानकेँ प्रत्येक घर आ प्रत्येक नागरिक धरि पहुँचेनाइ अछि।

जेपी गोलंबरसँ कारगिल चौक धरि निकलल एहि यात्रामे पूरा क्षेत्र तिरंगामय देखायल। लोक सभ उत्साहपूर्वक यात्रामे भाग लेलनि आ राष्ट्रभक्तिक नारासँ वातावरण गुंजायमान रहल।

तिरंगा यात्राक कारणेँ यातायातमे कएल गेल बदलाव

तिरंगा यात्राकेँ ध्यानमे राखि प्रशासनक तरफसँ सुरक्षा आ यातायातक विशेष व्यवस्था कएल गेल छल। सोमकेँ प्रातः करीब 7 बजेसँ गांधी मैदान, डाकबंगला चौराहा, जेपी गोलंबर, कारगिल चौक आ बुद्ध मार्गक आसपासक किछु मार्गपर वाहनक प्रवेश नियंत्रित कएल गेल छल।

यात्रामे सहभागी लोक आ आम यात्रीक सुविधा लेल वैकल्पिक मार्गक व्यवस्था सेहो कएल गेल छल। यात्रा समाप्त भेलाक बाद यातायात व्यवस्था पुनः सामान्य कऽ देल गेल।