बिहारमे छात्रक हितमे चारिटा पैघ घोषणा, सीएम सम्राटक महत्वपूर्ण पहल

गुणवत्तापूर्ण शिक्षासँ लऽ कऽ परीक्षा सुधार, विशेष सहयोग शिविर आ छात्र कल्याण धरि उठाओल गेल डेग

पटना । समदिया

बिहारमे छात्रसभक भविष्य आ शिक्षाक गुणवत्ताकेँ ध्यानमे राखि मुख्यमंत्री सम्राट चौधरीक सरकार चारिटा महत्वपूर्ण घोषणा कएलक अछि। मुख्यमंत्री सम्राट चौधरी रवि 9 अगस्तकेँ अपन एक्स हैंडलपर पोस्ट कऽ एहि घोषणासभक जानकारी देलनि। सरकारक एहि पहलमे गुणवत्तापूर्ण शिक्षा, परीक्षा व्यवस्थामे सुधार, विशेष सहयोग शिविर आ छात्र कल्याणसँ जुड़ल काज शामिल अछि।

मुख्यमंत्री अपन पोस्टमे कहलनि जे बिहारक शिक्षा व्यवस्थाकेँ आर बेसी सुदृढ़, गुणवत्तापूर्ण आ छात्र-केंद्रित बनयबाक लेल महत्वपूर्ण निर्णय लेल गेल अछि। गुणवत्तापूर्ण शिक्षा, बेहतर परीक्षा व्यवस्था आ छात्रसभक उज्ज्वल भविष्य निर्माणक लेल बिहार सरकार प्रतिबद्ध अछि।

गुणवत्तापूर्ण शिक्षाक लेल विशेष समिति

राज्यक प्रत्येक विद्यालय धरि गुणवत्तापूर्ण शिक्षा पहुँचेबाक लेल राज्यस्तरीय विशेष समितिक गठन कएल गेल अछि। समितिक उद्देश्य प्रत्येक विद्यालयकेँ उत्कृष्टताक केंद्र बनायब आ छात्रसभक सीखबाक स्तरमे लगातार सुधार सुनिश्चित करब अछि।

परीक्षामे होयत व्यापक सुधार

बिहारमे परीक्षा व्यवस्थाकेँ सुचारु, पारदर्शी, निष्पक्ष आ आधुनिक बनयबाक लेल राज्यस्तरीय परीक्षा सुधार समितिक गठन कएल गेल अछि। ई समिति बोर्ड परीक्षा, प्रतियोगी परीक्षा आ कक्षा-आधारित मूल्यांकनमे तकनीक आ आर्टिफिशियल इंटेलिजेंस (AI) केर उपयोगक माध्यमसँ छात्रसभक ज्ञान, समझ आ विश्लेषण क्षमताक बेहतर मूल्यांकन लेल सुझाव देत।

विशेष सहयोग शिविरक आयोजन

शिक्षा व्यवस्थामे सुधार आ छात्रसभक समस्या बुझबाक लेल विशेष सहयोग शिविर आयोजित कएल जाएत। एहि शिविरसभमे मुख्यमंत्री, मंत्री, सांसद आ विधायक छात्रसभसँ सीधा संवाद करताह। एहि क्रममे छात्रसभक सुझाव, समस्या आ आवश्यकताकेँ सुनि समाधानक प्रयास कएल जाएत।

छात्र कल्याण लेल निदेशालयक गठन

छात्र कल्याणसँ संबंधित योजनासभक बेहतर समन्वय आ प्रभावी क्रियान्वयन सुनिश्चित करबाक लेल संबंधित सभ विभागमे निदेशालयक गठन कएल जाएत। एकर माध्यमसँ छात्रसभसँ जुड़ल काजकेँ व्यवस्थित ढंगसँ लागू करबाक प्रयास होयत।

पेपर लीकक मुद्दाक बीच महत्वपूर्ण पहल

देशमे पेपर लीक आ परीक्षा व्यवस्थामे पारदर्शितासँ जुड़ल सवाल लगातार उठैत रहल अछि। एहेन समयमे बिहार सरकारक परीक्षा सुधार, तकनीक आ AI केर उपयोग तथा छात्रसभसँ सीधा संवादक पहल महत्वपूर्ण मानल जा रहल अछि। सरकारक एहि चारि घोषणासँ राज्यक शिक्षा व्यवस्था आर बेसी छात्र-केंद्रित आ प्रभावी बनेबाक अपेक्षा कएल जा रहल अछि।