तिरंगा यात्रा निकलत बिहारमे 10 सँ 17 अगस्त धरि, पटनामे सीएम सम्राटक नेतृत्व

जेपी गोलंबरसँ कारगिल चौक धरि राज्यस्तरीय तिरंगा यात्रा; 10 हजारसँ बेसी लोकक शामिल हेबाक संभावना, पटनामे ट्रैफिक प्लान जारी

पटना । समदिया

स्वतंत्रता दिवसक अवसर पर बिहार सरकारक कला, संस्कृति एवं युवा विभागक तत्वावधानमे 10 सँ 17 अगस्त धरि राज्यभरिमे तिरंगा यात्राक आयोजन कएल जायत। राज्यस्तरीय कार्यक्रमक शुरुआत 10 अगस्त, सोमदिन पटनासँ होयत। मुख्यमंत्री सम्राट चौधरीक नेतृत्वमे जेपी गोलंबरसँ कारगिल चौक धरि तिरंगा यात्रा निकालल जायत। एहि यात्रामे 10 हजारसँ बेसी लोकक शामिल होबाक संभावना अछि।

तिरंगा यात्राक बाद 17 अगस्त धरि राज्यक सभ 38 जिलामे आ 534 प्रखंडमे विभिन्न कार्यक्रम आयोजित कएल जायत। कला, संस्कृति एवं युवा विभागक मंत्री प्रमोद चंद्रवंशीक अनुसार कार्यक्रमक लेल राज्य सरकार द्वारा 6 करोड़ 12 लाख टकाक राशि उपलब्ध कराओल गेल अछि। सभ जिला आ प्रखंडकेँ कार्यक्रमक लेल एक-एक लाख टका देल गेल अछि, जखनि कि राज्यस्तरीय कार्यक्रम लेल 25 लाख टका निर्धारित कएल गेल अछि।

मंत्री लोकनिसँ बेसीसँ बेसी संख्यामे तिरंगा यात्रामे सहभागी बनेबाक अपील कयलनि।

14 अगस्तकेँ मनाओल जायत विभाजन विभीषिका दिवस

स्वतंत्रता दिवससँ पूर्व 14 अगस्तकेँ विभाजन विभीषिका दिवस सेहो मनाओल जायत। मंत्री प्रमोद चंद्रवंशी कहलनि जे देशक आजादीक इतिहासक संग नव पीढ़ीकेँ 1947क विभाजनक त्रासदीसँ सेहो परिचित कराओल जाएब जरूरी अछि।

विभाजनक समय भारी संख्यामे लोककेँ विस्थापन, हिंसा आ जान-मालक क्षतिक सामना करए पड़ल छल। एहि ऐतिहासिक घटनाक जानकारी युवा पीढ़ी धरि पहुँचाबय लेल विभाजन विभीषिका दिवसक आयोजन कएल जायत। मंत्री बिहारवासीकें तिरंगा यात्रा आ एहिसँ जुड़ल सभ कार्यक्रममे भाग लेबाक आग्रह कयलनि।

पटनामे बदलत यातायात व्यवस्था, जारी भेल विशेष ट्रैफिक प्लान

पटनामे 10 अगस्तकेँ होमयवला तिरंगा यात्राकेँ ध्यानमे रखैत यातायात पुलिस विशेष ट्रैफिक प्लान जारी कएने अछि। जेपी गोलंबरसँ कारगिल चौक धरि यात्राक दौरान प्रमुख सड़कसभ पर सामान्य वाहनक आवाजाही प्रभावित रहत। ई व्यवस्था सबेरे 7 बजेसँ कार्यक्रम समाप्त होबय धरि लागू रहत। आपातकालीन सेवाक वाहनकेँ प्रतिबंधसँ छूट देल गेल अछि।

डाकबंगलासँ जेपी गोलंबर धरि सामान्य वाहनक प्रवेश बंद

मुख्यमंत्री आ उपमुख्यमंत्रीक कारकेडकेँ ध्यानमे रखैत डाकबंगला चौराहासँ जेपी गोलंबर धरि मार्ग आरक्षित राखल जायत। एहि रास्तामे सामान्य वाहनक प्रवेश नहि होयत। वाहन चालककेँ वैकल्पिक मार्गक उपयोग करबाक होयत।

तिरंगा यात्रामे सहभागी होबयवला लोकक वाहनक पार्किंग गांधी मैदानमे कएल जायत। आम लोकक प्रवेश लेल गेट नंबर 1 आ 13 निर्धारित अछि, जखनिकि मुख्यमंत्रीक प्रवेश लेल गेट नंबर 12 आरक्षित रहत।

पटना जंक्शनसँ गांधी मैदान लेल ऑटो रूटमे बदलाव

पटना जंक्शनसँ गांधी मैदान दिसि जाएवला ऑटो डाकबंगला चौराहासँ न्यू डाकबंगला रोड, भट्टाचार्य मोड़ आ एक्जीविशन रोड होइत आगाँ जायत। वापसी लेल सीडीए बिल्डिंग गोलंबर आ गोरियाटोलीक रास्ता निर्धारित कएल गेल अछि।

एक्जीविशन रोडसँ गांधी मैदान आ गोरियाटोलीसँ गांधी मैदान दिसि व्यावसायिक वाहनक प्रवेश पर रोक रहत।

मालवाहक वाहनक परिचालन पर सेहो रोक

तिरंगा यात्राक दौरान कतेको मार्ग पर मालवाहक आ व्यावसायिक वाहनक परिचालन प्रतिबंधित रहत। चिरैयाटाड़ आ गोरियाटोली दिसि मालवाहक वाहन नहि जा सकत। ओतहि मीठापुरसँ बुद्ध मार्ग आ आर-ब्लॉक गोलंबरसँ आयकर गोलंबर दिसि भारी वाहनक परिचालन सेहो रोकल जायत।

सरकार लोकसँ अपील कएने अछि जे स्वतंत्रता दिवसक अवसर पर आयोजित तिरंगा यात्रा आ अन्य कार्यक्रममे उत्साहपूर्वक भाग लैत राष्ट्रप्रेमक भावना प्रदर्शित करथि आ यातायात व्यवस्थामे सहयोग करथि।