पूर्वी चम्पारणमे 54 किलो गाँजाक संग तीन तस्कर गिरफ्तार, कार आ नगदी सेहो जब्त
मोतिहारी। समदिया
पूर्वी चम्पारण जिलाक कुंडवा चैनपुर थाना पुलिस मादक पदार्थक तस्करी विरुद्ध एकटा पैघ कार्रवाई करैत 54 किलोग्राम गाँजाक संग तीन गोटे कथित तस्करकेँ गिरफ्तार कयलक। पुलिस आरोपीक कब्जासँ एकटा कार, तीनटा मोबाइल फोन आ 10,800 रुपैया नगद सेहो बरामद कयने अछि।
अनुमंडल पुलिस पदाधिकारी (सिकरहना) अभिषेक कुमारक अनुसार पुलिसकेँ गुप्त सूचना भेटल छल जे बसंतपुर गाम दिशिसँ एकटा कारमे गाँजा लादि चकिया दिशि तस्करी कयल जा रहल अछि। सूचनाक सत्यापनक बाद हुनक नेतृत्वमे पुलिस टीम गठित कय बसा खुर्द सैनिक रोड पर वाहन जाँच अभियान चलाओल गेल।
घेराबंदीक दौरान कार पर सवार दू गोटेकेँ पकड़ल गेल। तलाशीमे कारसँ 54 किलोग्राम गाँजा, तीनटा मोबाइल फोन, 10,800 रुपैया नगद आ कार बरामद भेल। गिरफ्तार आरोपीक पहिचान चकिया थाना क्षेत्रक गंगा सिरिसिया निवासी कमलेश कुमार आ मुजफ्फरपुर निवासी संजय कुमार तिवारीक रूपमे भेल अछि।
पुलिसक अनुसार दुनू आरोपीसँ पूछताछक आधार पर बसंतपुर निवासी विनोद मुखियाकेँ सेहो गिरफ्तार कयल गेल अछि। तीनू आरोपीसँ पूछताछ जारी अछि आ एहि अवैध कारोबारसँ जुड़ल आन लोकक भूमिकाक सेहो जाँच कयल जा रहल अछि।
एहि संबंधमे कुंडवा चैनपुर थानामे संबंधित धारामे प्राथमिकी दर्ज कयल गेल अछि। बरामद मादक पदार्थकेँ जब्त कय विधिसम्मत कार्रवाई शुरू कय देल गेल अछि। पुलिस ई पता लगाबयमे जुटल अछि जे गाँजाक ई खेप कतयसँ आनल गेल छल आ एकरा कतय पहुँचेबाक योजना छल।
पुलिस कहलनि जे जिलामे मादक पदार्थक तस्करीक विरुद्ध अभियान निरंतर जारी रहत आ एहेन अवैध कारोबारमे संलिप्त लोकसभ पर कड़ा कार्रवाई कयल जाएत।
