जेपीएससी-जेएसएससी भर्ती विवाद : छात्र आंदोलन जारी, सरकार वार्ताक लेल तैयार
राँची । समदिया
झारखंडक राजधानी रांचीमे झारखंड लोक सेवा आयोग (JPSC) आ झारखंड कर्मचारी चयन आयोग (JSSC)क भर्ती परीक्षामे कथित अनियमितता, प्रश्नपत्र लीक आ धांधलीक आरोपकेँ लऽ कऽ छात्रसभक आंदोलन लगातार तेज भऽ रहल अछि। एहि बीच राज्य सरकार आंदोलनकारी छात्रसभसँ वार्ताक पहल कयने अछि।
प्रशासनक प्रतिनिधिक रूपमे रांचीक अनुमंडल पदाधिकारी (एसडीएम) धरना स्थल पर पहुँचि छात्रसभसँ पाँच सदस्यीय प्रतिनिधिमंडल बनाकऽ सरकारसँ बातचीत करबाक आग्रह कयलनि। हुनका अनुसार मुख्यमंत्रीक संदेश अछि जे सरकार बुधदिन साँझ 4 बजे सर्किट हाउसमे छात्र प्रतिनिधिसभसँ वार्ता करबाक लेल तैयार अछि।
मुदा आंदोलनकारी छात्रसभ बंद कमरामे वार्ता करबाक प्रस्ताव अस्वीकार कऽ देलनि। हुनकर स्पष्ट मांग अछि जे वार्ता मीडिया आ आम लोकक उपस्थितिमे सार्वजनिक रूपसँ होय। छात्रसभ ईहो कहलनि जे जँ सरकार वास्तवमे समाधान चाहैत अछि तँ मुख्यमंत्री स्वयं धरना स्थल पर आबि छात्रसभसँ प्रत्यक्ष संवाद करथि। फिलहाल प्रशासन आ आंदोलनकारी छात्रसभक बीच बातचीत जारी अछि।
एहि आंदोलनकेँ लऽ राजनीतिक गतिविधि सेहो तेज भऽ गेल अछि। नेता प्रतिपक्ष बाबूलाल मरांडीक नेतृत्वमे एनडीए विधायकसभ आंदोलनकारी छात्रसभसँ भेंट करबाक घोषणा कयने छथि। एकर बाद आंदोलन आ भर्ती विवाद पर राजनीतिक बयानबाजी आरो तेज होयबाक संभावना व्यक्त कयल जा रहल अछि।