सैनिक स्कूलकेँ लऽ संसदीय समितिक बैठकमे गरमायल माहौल, राहुलक आरएसएसक कब्जावाला आरोप पर मांगल गेल सबूत
नई दिल्ली । समदिया
रक्षा मामिलासँ जुड़ल संसदीय स्थायी समितिक मंगलदिनक बैठक सैनिक स्कूलकेँ लऽ तीक्षण बहसक कारण चर्चामे रहल। बैठकक दौरान लोकसभामे प्रतिपक्षक नेता राहुल गांधी आरोप लगौलनि जे राष्ट्रीय स्वयंसेवक संघ (RSS) सँ जुड़ल लोक सैनिक स्कूलक संचालन पर प्रभाव बढ़ा रहल छथि। हुनक एहि दावापर सत्ता पक्षक सांसदसभ आपत्ति जनौलनि आ आरोपक समर्थनमे प्रमाण प्रस्तुत करबाक मांग कयलनि।
सूत्रक अनुसार, समितिक अध्यक्ष राधा मोहन सिंह राहुल गांधीसँ कहलनि जे यदि एहि विषयमे हुनका लग कोनो ठोस दस्तावेज अथवा तथ्य अछि तँ ओ समितिक समक्ष प्रस्तुत करथि। अध्यक्ष आश्वासन देलनि जे उपलब्ध कराओल गेल प्रमाण संबंधित मंत्रालयक पास पठा कऽ निष्पक्ष जांच कराओल जाएत।
बैठकक दौरान भाजपा सांसद सुधांशु त्रिवेदी राहुल गांधीसँ पूछलनि जे सैनिक स्कूलसभ पर RSSक प्रभाव बढ़बाक आरोपक आधार की अछि। एहि प्रश्नक बाद सत्ता पक्ष आ विपक्षक सदस्यसभक बीच किछु समय धरि तीक्षण नोकझोंक भेल, जाहिसँ बैठकक वातावरण गरमा गेल।
भाजपा सांसदसभक पक्ष छल जे सार्वजनिक-निजी सहभागिता (PPP) मॉडलक अंतर्गत संचालित नव सैनिक स्कूलसभक संचालन करैत संस्था सभक RSSसँ कोनो प्रत्यक्ष संबंध नहि अछि। हुनकर कहब छल जे पर्याप्त तथ्य बिना एहेन आरोप लगेनाइ उचित नहि अछि।
स्थिति तनावपूर्ण होइत देखि समितिक अध्यक्ष राधा मोहन सिंह हस्तक्षेप कऽ सभ सदस्यसँ शांत रहबाक आग्रह कयलनि। ओ स्पष्ट कहलनि जे समिति कोनो निष्कर्ष केवल तथ्य आ दस्तावेजक आधार पर निकालत। राहुल गांधी जँ प्रमाण उपलब्ध करौताह तँ तकर जांच करबाक लेल संबंधित मंत्रालयसँ प्रतिवेदन मंगाओल जाएत।
बैठकक उपरांत पत्रकारसभक प्रश्न पर राहुल गांधी टिप्पणी करएसँ इन्कार करैत कहलनि जे संसदीय समितिक भीतर भेल चर्चाक जानकारी सार्वजनिक करबाक अनुमति नहि अछि।
सूत्रसभक अनुसार, बैठकमे PPP मॉडल अंतर्गत संचालित सैनिक स्कूलसभक सूची तथा ओकर संचालन करैत संस्थासभक सेहो समीक्षा करबाक विषय उठल। किछु राजनीतिक पक्ष विद्या भारती आ सरस्वती शिशु मंदिर जेकाँ संस्थासभक भूमिका पर प्रश्न उठा रहल छथि, जखनिकि एहि विषयमे विभिन्न दलसभक अलग-अलग मत अछि। फिलहाल समितिक अध्यक्ष स्पष्ट कयलनि जे समुचित जांच आ उपलब्ध प्रमाणक समीक्षा उपरांत मात्र कोनो निष्कर्ष निकालल जाएत।
