पीएम सूर्य घर योजनासँ 50 लाखसँ अधिक परिवार लाभान्वित, 19 लाख घरक बिजली बिल भेल शून्य
नई दिल्ली । समदिया
केन्द्र सरकारक महत्वाकांक्षी पीएम सूर्य घर : मुफ्त बिजली योजना अपन शुभारम्भक मात्र दू वर्षक भीतर महत्वपूर्ण उपलब्धि हासिल कएलक अछि। नवीन आ नवीकरणीय ऊर्जा मन्त्रालयक अनुसार योजनाक अन्तर्गत एखनि धरि 50.06 लाखसँ अधिक परिवार लाभान्वित भऽ चुकल छथि। सरकारक अनुसार ई विश्वक सभसँ पैघ घरेलू रूफटॉप सोलर कार्यक्रममे सँ एक मानल जा रहल अछि।
मन्त्रालयक कहब अछि जे योजना लागू होएबासँ पहिने पूरा दस वर्षमे केवल 7.94 लाख रूफटॉप सोलर संयंत्र स्थापित भेल छल, जखनिकि पीएम सूर्य घर योजनाक माध्यमसँ मात्र दू वर्षमे एकर कतेको गुणा बेसी परिवार धरि पहुँच बनाओल गेल अछि। 75,021 करोड़ रुपैयाक बजटवाला ई योजना विश्वक तीव्र गतिसँ बढ़ैत स्वच्छ ऊर्जा अभियानसभमे अपन स्थान बना रहल अछि।
सरकारक अनुसार योजनाक लोकप्रियताक अनुमान एहि बातिसँ लगाओल जा सकैत अछि जे वर्तमानमे लगभग प्रत्येक छह दिनमे एक लाख परिवार एहि योजनासँ जुड़ि रहल छथि। पछिला नौ मासमे रूफटॉप सोलर स्थापना दर तीन गुणासँ अधिक बढ़ल अछि। अक्टूबर 2025 मे जतय प्रतिदिन औसतन 5,038 स्थापना होइत छल, ओतहि जुलाई 2026 मे ई संख्या बढ़िकऽ 16,328 प्रतिदिन धरि पहुँचि गेल।
मन्त्रालयक अनुसार जुलाई 2026 योजनाक इतिहासमे सभसँ सफल मास सिद्ध भेल, जाहिमे मात्र एक मासक भीतर 5.06 लाख परिवार लाभान्वित भेल।
योजनाक विस्तारमे तेजी आनबाक लेल सरकार प्रत्यक्ष लाभ अंतरण (डीबीटी) माध्यमसँ लाभार्थी सभक खातामे एखन धरि 28,024 करोड़ रुपैया सब्सिडी हस्तांतरित कएने अछि। एकर परिणामस्वरूप सोलर प्रणाली लगेबाक लागतमे उल्लेखनीय कमी आएल अछि।
सरकारक आँकड़ाक अनुसार योजनाक प्रभावसँ लगभग 19 लाख परिवारक बिजली बिल शून्य भऽ गेल अछि। एकर अतिरिक्त 12 लाखसँ अधिक परिवार अतिरिक्त उत्पादित बिजली ग्रिडमे बेचिकऽ वित्तीय वर्ष 2024-25 मे कुल 421 करोड़ रुपैया आय अर्जित कएने छथि। एहि हिसाबसँ प्रति परिवारकेँ औसतन 3,500 रुपैया वार्षिक अतिरिक्त आमदनी भेल अछि।
आर्थिक रूपसँ कमजोर वर्गसभ धरि योजनाक लाभ पहुँचय, एकरा लेल विशेष प्रयास कएल जा रहल अछि। सरकारक अनुसार प्रधानमंत्री आवास योजना, बीपीएल तथा अनुसूचित जाति-जनजाति परिवारसभ लेल चारि राज्यमे लगभग 1.6 लाख सोलर स्थापना पूर्ण भऽ चुकल अछि, आ आब एहि मॉडलकेँ 12 राज्य धरि विस्तारित करबाक स्वीकृति देल गेल अछि।
मन्त्रालयक अनुसार योजना केवल स्वच्छ ऊर्जाकेँ बढ़ावा नहि दऽ रहल अछि, बल्कि रोजगारक नव अवसर सेहो सृजित कऽ रहल अछि। एखनि धरि 34,219 विक्रेता पंजीकृत भेल छथि, जाहिमे 29,469 सक्रिय छथि। विभिन्न प्रशिक्षण कार्यक्रमसभक माध्यमसँ 2.32 लाखसँ अधिक व्यक्तिकेँ प्रशिक्षित कएल जा चुकल अछि।
मन्त्रालयक कहब अछि जे योजनाक अन्तर्गत एखनि धरि कुल 14.8 गीगावाट रूफटॉप सोलर क्षमता स्थापित कएल जा चुकल अछि। सरकारक विश्वास अछि जे ई योजना देशमे स्वच्छ ऊर्जाक उपयोग बढ़ेबाक संग-संग आम परिवारक बिजली खर्च घटेबामे आ हुनक आय बढ़ेबामे महत्वपूर्ण भूमिका निभा रहल अछि।
