डेहरी ईओ हत्याकाण्ड पर तेजस्वीक सरकार आ पुलिस पर निशाना, निष्पक्ष जाँचक उठौलनि माँग
पटना । समदिया
डेहरी नगर परिषदक कार्यपालक पदाधिकारी विमल कुमार हत्याकाण्डकेँ लऽ कऽ बिहारक राजनीति फेर गरमा गेल अछि। नेता प्रतिपक्ष तेजस्वी यादव पीड़ित परिवारसँ भेंटक बाद राज्य सरकार, पुलिस प्रशासन आ सत्तारूढ़ गठबंधन पर गंभीर आरोप लगबैत कहलनि जे एहि प्रकरणमे मुख्य आरोपीकेँ बचेबाक प्रयास भऽ रहल अछि। हुनक अनुसार ई घटना केवल एकटा अधिकारीक हत्या नहि, बल्कि सम्पूर्ण प्रशासनिक व्यवस्थाक लेल चुनौती अछि।
तेजस्वी यादव पत्रकारसभसँ बातचीतमे कहलनि जे डेहरीक कार्यपालक पदाधिकारी विमल कुमारक हत्या अत्यन्त गंभीर घटना अछि। हुनकर दावा छल जे मुख्यमंत्री सम्राट चौधरीक कार्यकालमे ई दोसर अधिकारीक हत्या अछि, जाहिसँ राज्यक अधिकारीसभमे असुरक्षाक भावना उत्पन्न भेल अछि।
नेता प्रतिपक्ष आरोप लगौलनि जे लोक जनशक्ति पार्टी (रामविलास)क एकटा विधायक एहि घटनाक मुख्य आरोपी छथि, मुदा पुलिस हुनकर नाम सार्वजनिक करबाक बदला केवल चालककेँ आरोपी बनाकऽ मामिलाक निष्पक्ष जाँचसँ बचि रहल अछि। हुनक कहब छल जे मृतकक शरीरक अवस्थासँ प्रतीत होइत अछि जे घटनामे एकसँ बेसी लोकक संलिप्तता भऽ सकैत अछि, तेँ सम्पूर्ण घटनाक निष्पक्ष जाँच होयब आवश्यक अछि।
तेजस्वी यादव पुलिसक जाँच पर सेहो प्रश्न उठबैत कहलनि जे प्रारम्भमे चालक दू अज्ञात बाइक सवार द्वारा हत्याक बात कहलनि, मुदा आब ओ स्वयं हत्या करबाक स्वीकारोक्ति देलक अछि। हुनक अनुसार पुलिसक बयान लगातार बदलैत रहल अछि, जाहिसँ जाँचक निष्पक्षतापर प्रश्नचिह्न ठाढ़ होइत अछि।
संगहि तेजस्वी यादव आरोप लगौलनि जे संबंधित विधायक पर रंगदारी मांगबाक आ हत्या षड्यंत्र रचबाक आरोपक सेहो जाँच होयबाक चाही। हुनक कहब छल जे एखनि धरि विधायकक विरुद्ध नामजद प्राथमिकी दर्ज नहि कयल गेल अछि। तथापि, एहि आरोपक समर्थनमे कोनो सार्वजनिक दस्तावेज अथवा आधिकारिक जाँच प्रतिवेदन प्रस्तुत नहि कयल गेल अछि।
नेता प्रतिपक्ष राज्य सरकारसँ मृत अधिकारीक परिवारकेँ समुचित सुरक्षा उपलब्ध कराबय तथा हुनकर पत्नीकेँ सरकारी नौकरी देबाक माँग सेहो कयलनि। समाचार लिखल जाए धरि राज्य सरकार, संबंधित विधायक अथवा बिहार पुलिसक तरफसँ तेजस्वी यादवक आरोप पर कोनो आधिकारिक प्रतिक्रिया सामने नहि आएल छल।
