‘नशामुक्त युवासँ विकसित भारतक संकल्प, युवासभ नशा आ ड्रग्ससँ दूर रहथि’ : पीएम मोदी

100 सप्ताह धरि चलयवाला राष्ट्रीय अभियानक शुभारम्भ, परिवार, समाज आ शिक्षण संस्थानसभक सक्रिय सहभागिताक आह्वान

नई दिल्ली । समदिया

प्रधानमंत्री नरेंद्र मोदी रविकेँ नशामुक्त युवा सभसँ ‘विकसित भारत संकल्प अभियान’क शुभारम्भ कएलनि। ई अभियान आगामी 100 सप्ताह धरि देशभरिमे चलत, जाहिमे विशेष रूपसँ युवासभकेँ नशा आ मादक पदार्थक दुष्प्रभाव बुझबाक, सजग रहबाक आ एहि विनाशकारी लतसँ दूर रहबाक संकल्प लेबाक आह्वान कएल गेल अछि।

प्रधानमंत्री कहलनि जे विकसित भारतक सपना तखनहि साकार भऽ सकैत अछि, जखनि देशक युवा शारीरिक, मानसिक आ नैतिक रूपसँ स्वस्थ, आत्मविश्वासी आ नशामुक्त रहत। हुनका अनुसार, नशा केवल एक व्यक्तिक नहि, बल्कि परिवार, समाज आ सम्पूर्ण राष्ट्रक भविष्यक लेल गंभीर चुनौती अछि।

प्रधानमंत्री मोदी कहलनि जे जखनि कोनो कार्य जनआन्दोलनक रूप लैत अछि, तखनि करोड़ों लोकक सहभागितासँ ओकर प्रभाव अनेक गुना बढ़ि जाइत अछि। हुनका विश्वास अछि जे ई अभियान प्रत्येक युवाक मनकेँ स्पर्श करत आ नशामुक्त भारतक दिशामे सशक्त जनचेतना उत्पन्न करत।

युवासभकेँ संबोधित करैत प्रधानमंत्री कहलनि जे भारतक ‘अमृत पीढ़ी’ 2047 धरि विकसित भारतक निर्माणमे निर्णायक भूमिका निभाओत। एहि लेल अपन प्रतिभा, ऊर्जा आ भविष्यकेँ सुरक्षित रखबाक खातिर नशासँ दूर रहब अत्यन्त आवश्यक अछि।

ओ परिवारसभसँ सेहो आग्रह कएलनि जे जँ कोनो बालक अथवा युवा नशाक चपेटमे आबि जाइत अछि, तँ सामाजिक लोकलाजक कारण ओहि बातकेँ नुकाउ नहि। समय पर चिकित्सकीय सहायता, पुनर्वास केन्द्र आ परिवारक खुलल संवादसँ युवाकेँ सामान्य जीवनमे फेर अनल जा सकैत अछि।

प्रधानमंत्री विद्यालय, महाविद्यालय आ विश्वविद्यालयक शिक्षकसभसँ सेहो अपील कएलनि जे पाठ्यक्रमक संग-संग विद्यार्थीसभकेँ ड्रग्सक दुष्प्रभावक विषयमे जागरूक करथि आ परिसरमे नशामुक्तिक जनअभियान चलाबथि।

ओ कहलनि जे केन्द्र सरकार ड्रग्स माफियासभ पर लगातार कठोर कार्रवाई कऽ रहल अछि। पूर्वक अपेक्षा अनेक गुना बेसी गिरफ्तारी भेल अछि आ हजारों करोड़ रुपैयाक मादक पदार्थ जब्त कएल गेल अछि। सरकार नशाक अवैध कारोबार पर पूर्ण कठोरतासँ अंकुश लगाबए लेल प्रतिबद्ध अछि।

प्रधानमंत्री अन्तमे युवासभसँ आग्रह कएलनि जे क्षणिक उत्साहक लेल नशाक बाट नहि चुनू। ड्रग्स अल्पकालिक नशा तँ दैत अछि, मुदा दीर्घकालमे करियर, परिवार आ जीवन—तीनूकेँ गम्भीर क्षति पहुँचाबैत अछि। नशामुक्त युवे सभ मिलिकए विकसित भारतक आधार बनत।